Sigmundur Davíð Gunnlaugsson, formaður Miðflokksins og fyrrverandi forsætisráðherra hélt því fram að hann væri þolandi í Klaustursmálinu. Það kom fram í viðtali sem Páll Magnússon tók við hann í þættinum Pólitík. Katrín Jakobsdóttir, forsætisráðherra var einnig gestur í þættinum.
Páll spurði Sigmund hvort Miðflokkurinn væri enn að gjalda fyrir Klaustursmálið, sem átti sér stað árið 2018. Sigmundur svaraði neitandi og sagði að ef svo væri þætti honum það ósanngjarnt, þar sem hann og hinir sem áttu í hlut væru þolendur skipulagðs glæps.
„Getur verið að þið séuð enn með einhverjum hætti að gjalda fyrir Klaustursmálið alræmda?“ spurði Páll. Svar Sigmundar var eftirfarandi:
„Mér finnst það ólíklegt. Mér myndi finnast það ósanngjarnt ef að menn yrðu látnir gjalda fyrir það að vera þolendur þess sem síðar kom í ljós að var glæpur, skipulagður glæpur,“
Í kjölfarið tók hann fram að fylgi Miðflokksins hefði verið mest eftir að Klaustursmálið átti sér stað og því þætti honum ólíklegt að það hefði skaðað flokkinn. Hann vildi hins vegar meina það sem væri að valda minna fylgi flokksins væri heimsfaraldurinn, en í síðustu skoðanakönnunum hefur Miðflokkurinn fengið heldur dræmt fylgi.
Líkt og flestir muna átti Klaustursmálið sér stað í nóvember 2018, þegar Bára Halldórsdóttir tók upp samtal þingmannanna Sigmundar Davíðs Gunnlaugssonar, Gunnars Braga Sveinssonar, Önnu Kolbrúnar Árnadóttur og Bergþórs Ólasonar, Ólafs Ísleifssonar og Karls Gauta Hjaltasonar á kránni Klaustur. Þingmennirnir létu þar orð falla sem þóttusýna fram á fordóma þeirra sem töluðu. Síðar úrskurðaði Persónuvernd að upptökurnar væru ólöglegar, og var Báru gert að eyða þeim.
