Indriði Stefánsson, tölvunarfræðingur og frambjóðandi Pírata til Alþingiskosninga, er einn þeirra sem finnur sápubragð af kóríander og vill meina að það sé hægt að bera það saman við kjördæmaóréttlæti.

„Það er mikilvægt að stjórnmálamenn skilji og virði afstöðu kjósenda. Sumir kjósendur skipta stjórnmálamenn þó meira máli en aðrir. Í því samhengi má benda á að í Norðvesturkjördæmi voru rúmlega 21 þúsund á kjörskrá í fyrra. Þessir 21 þúsund kjósendur eru í dag með 8 þingmenn á Alþingi,“ segir Indriði og bendir á að svipaður fjöldi sé á kjörskrá í Hafnarfirði.

Þó er Hafnarfjörður einn og sér ekki með átta þingmenn heldur deila þeir 13 þingmönnum með Kópavogi, Garðabæ, Mosfellsbæ, Seltjarnarnesi og Kjósarhreppi en þar bætast við 52 þúsund kjósendur. Því er hver þingmaður í Norðvesturkjördæmi með 2.600 kjósendur á bak við sig en í Suðvesturkjördæmi eru þeir 5.600.

„Hvers vegna er þetta svona? Kosningakerfið á Íslandi – með sínu innbyggða óréttlæti – er ennþá svona því það hentar ákveðnum flokkum vel, sérstaklega Framsókn og Sjálfstæðisflokki. Flokkum sem ítrekað hafa verið í aðstöðu til þess að sýna að þeim þyki kjósendur skipta jafn miklu máli,“ segir Indriði en þrisvar sinnum hefur meirihlutinn fellt tillögur um að lagfæra þetta kerfi.

Framsóknarflokkurinn og Sjálfstæðisflokkurinn hafa verið mikið á móti þessari lagfæringu þar sem hún hentar þeim afar illa.

„Á sama hátt og ég kæri mig ekki um að fá kóríander í matinn minn kæri ég mig ekki um að það þurfi þúsundir fleiri kjósenda til að ná alþingismanni í mínu kjördæmi og íhaldssamir flokkar fái meirihluta fulltrúa á grundvelli minnihluta atkvæða. Ólíkt kóríanderóþolinu mínu er hins vegar auðvelt að bæta úr kjördæmaóréttlætinu. Kjósum flokka sem vilja breytingar,“ segir Indriði að lokum.