Þórhildur Sunna Ævarsdóttir, þingmaður Pírata, mun í dag klukkan 17:00 ræða við Jóhannes Stefánsson, uppljóstrara í Samherjamálinu, í beinni útsendingu frá höfuðstöðvum Pírata í Síðumúla. Í tilkynningu frá flokknum segir að þau muni ræða Samherja, framgöngu fyrirtækisins og aðför þess gegn fjölmiðlum, félagasamtökum og stjórnmálamönnum. Jóhannes er fyrrverandi starfsmaður Samherja  í Namibíu.

Útsendinguna má nálgast á piratar.tv og á Facebook-síðu Pírata.  Hún er einnig aðgengileg hér að neðan í beinu streymi. Áhorfendur geta sent þeim Þórhildi og Jóhannesi spurningar í gegn um netið.

Alþjóðasamtökin Transparency International, sem berjast gegn spillingu um allan heim, sendi frá sér yfirlýsingu í dag þar sem fram kom að samtökin hafa áhyggjur af framferði Samherja gagnvart fjölmiðlafólki og forystufólki frjálsra félagasamtaka, sem fjallað hafa um meint peningaþvætti, skattsvik og mútur Samherja. Yfirlýsinguna má lesa hér í heild sinni.