Stormar hafa geisað á samfélagsmiðlum eftir að Bubbi Morthens, einn ástælasti tónlistarmaður þjóðarinnar, talaði gegn Samherja í vikunni. Brynjar Níelsson, þingmaður Sjálfstæðisflokksins, ákvað að senda Bubba pillu vegna skrifana en pillan hefur farið misjafnlega vel ofan í fólk.

Brynjar sagði til að mynda að Bubbi og aðrir listamenn þjóðarinnar væru ekki að fá nein heiðurslaun ef ekki væri fyrir fyrirtæki eins og Samherja. „Að lokum vil ég segja við poppstjörnur í eldri kantinum, sem hafa áhyggjur af þögn þingmanna um Samherja, að það þarf öflug fyrirtæki, sem geta gert mikil verðmæti úr auðlindum okkar, til að greiða ykkur um hálfa milljón á mánuði í heiðursskyni til æviloka,“ sagði Brynjar.

Hallgrímur Helgason rithöfundur hefur nú stigið inn í þessar erjur. Hann gerir það með færslu sem hefur vakið töluverða athygli, bæði á Facebook og á Twitter, en í færslunni ber hann þá Bubba og Brynjar saman á árunum 2013 til 2021. Hallgrímur bendir á að á meðan Bubbi hefur gefið út 67 lög, 4 plötur, 3 ljóðabækur, haldið 256 tónleika, veitt 79 laxa, verið fyrirmyndin að söngleik og sent 15 aðsendar greinar hefur Brynjar ekki gert jafn mikið.

„BUBBI: 67 lög, 4 plötur, 3 ljóðabækur, 256 tónleikar, 79 laxar, 1 söngleikur, 15 aðsendar greinar.“

„BRYNJAR: þingmaður, 0 lög, 0 frumvörp, 0 fyrirspurnir, 5 ræður, 23 aðsendar greinar, 342 komur í Bítið á “Bylgjunni.“

Þá bendir Hallgrímur á að Bubbi hefur fengið 38,4 milljónir frá ríkinu á þessum tíma á meðan Brynjar hefur fyrir störf sín fengið 115,2 milljónir. „ROTHÖGG,“ segir í einni athugasemd við færsluna og ljóst er að margir eru á sama máli.