Kristín Soffía Jónsdóttir, borgarfulltrúi Samfylkingarinnar, vendir nú kvæði sínu í kross og siglir á önnur mið eftir 11 ár í starfi hjá Reykjavíkurborg. Hún hefur verið ráðinn framkvæmdastjóri Icelandic Startups og hefur störf í sumar. Hún tekur við starfinu af Salómé Guðmundsdóttur.
Icelandic startups er í eigi Origo, Háskóla Íslands, Háskólans í Reykjavík, Samtaka iðnaðarins og Nýsköpunarsjóðs atvinnulífsins. Fyrirtækið veitir frumkvöðlum og sprotafyrirtækjum á Íslandi stuðning og stendur meðal annars að viðskiptahraðlinum Startup Supernova sem er stökkpallur fyrir sprotafyrirtæki. Eins sér fyrirtækið um að skipuleggja nýsköpunarverkefnin Gulleggið, Til sjávar og veita, Startup orkidea, Snjallræði, Hringiðu og Firestarter.
Kristín Soffía greinir frá þessu á samfélagsmiðlum:
„Eftir frábær 11 ár í borginni hef ég ákveðið á sigla á önnur mið og tek í sumar við sem framkvæmdastjóri Icelandic Startups. Ég er virkilega þakklát fyrir þetta tækifæri og full tilhlökkunar.
Ég hef lært svo margt og skemmt mér svo vel á þessum rúma áratug sem ég hef helgað borgarmálum og get ég alveg mælt með þeim starfvettvangi.
Í dag er nýsköpun ekki bara spennandi og skemmtileg, hún er nauðsynleg til að skapa hér störf og græna framtíð og ég er tilbúin að leggja mitt að mörkum.
Næst á dagskrá er að hitta verðandi samstarfsfólk og undirbúa þessar breytingar.“