Rósa Björk Brynjólfsdóttir skipar annað sætið á lista Samfylkingarinnar í Reykjavíkurkjördæmi suður fyrir næstu Alþingiskosningar. Ljóst er af tilkynningu sem Rósa birti á Facebook-síðu sinni í gær að hún gerði sér vonir um oddvitasæti. Um þetta segir Rósa:
„Þið sem þekkið mig vitið að ég hef löngun til að láta að mér kveða og sækjast eftir forystu þar sem ég kem. Ég hafði gefið það út að ég sóttist eftir að fá að leiða lista Samfylkingarinnar í Suðvesturkjördæmi, þar sem ég hef starfað sem þingmaður og oddviti síðan 2016 og þar áður í önnur þrjú sem virkur varaþingmaður. Ég hringdi ótal símtöl í lykilfólk í kjördæminu og félaga í flokknum, almenna kjósendur en ekki síður við fólk sem var tilbúið að ganga til liðs við Samfylkinguna. Það er skemmst frá því að segja að mér var afar vel tekið, sem gladdi mig mjög. En eftir því sem á leið rann upp fyrir mér að harðasti kjarninn sem myndaði uppstillingarnefndina í Kraganum væri ekki líklegur til að bjóða konu sem væri svo nýlega gengin í flokkinn oddvitasætið.“
Rósa segir að reynsla síðustu vikna hafi kennt sér margt og að ýmisu sem gerðist vilji hún gleyma sem fyrst. Hún þakkar fyrir stuðninginn og horfir björt fram á veginn, en færslu hennar má lesa með því að smella á tengilinn hér fyrir neðan.
https://www.facebook.com/rosabjorkbrynjolfsdottir/posts/2810867619127946