Logi Einarsson þingmaður og formaður Samfylkingarinnar skrifaði um efnahagsleg áhrif COVID-19 í pistli sem birtist í Fréttablaðinu í morgun. Hann telur að á meðan að Sjálfstæðisflokkurinn sé við stjórnvölinn sé hættan líkleg til að magnast.
Hann segir að allir verði fyrir óþægindum vegna sóttvarnarreglna, á meðan að það sé misjafnt hverjir finni fyrir efnahagslegum áhrifum. Logi segist hafa áhyggjur af fólkinu sem lendi í versta tekjutapi eða atvinnumissi. Hann segir að örva þurfi atvinnulífið og forðast það að ójöfnuður verði enn meiri.
„Nú þegar verslunarmannahelgin er að baki og fólk snýr aftur til vinnu eftir sumarleyfi verður manni hugsað til þeirra þúsunda Íslendinga sem hafa misst eða eru að missa vinnuna. Á meðan síðasta efnahagskreppa kom við fjárhag flestra Íslendinga, þó með ólíkum hætti væri, bitnar núverandi kreppa mjög misilla á fólki, þó allir verði vissulega fyrir óþægindum vegna sóttvarna. Sumir finna varla fyrir efnahagslegum áhrifum á meðan tugþúsundir Íslendinga verða fyrir miklu tekjutapi vegna atvinnumissis. Ég hef áhyggjur af því fólki.
Við þurfum að leita allra leiða til að örva atvinnulífið á nýjan leik og draga úr þeim félagslega vanda sem hlýst af tekjumissi vegna atvinnuleysis, veikinda eða annars konar röskunar vegna heimsfaraldursins. Það þarf að hindra með öllum ráðum að ójöfnuður aukist í þessu ástandi og í kjölfar þess. Þess vegna þarf að vernda velferðarkerfið, helsta öryggisnetið okkar, þegar áfall ríður yfir. Heilbrigðiskerfið, sem hefur verið undir sérstöku álagi, verður að fá nægt rekstrarfjármagn til að tryggja áfram fyrirtaks þjónustu við almenning.“
Logi vitnar í þrjá þingmenn Sjálfstæðisflokksins og segir að hættan sé líkleg til að aukast á meðan að sá flokkur sé við stjórnvölinn.
„En með Sjálfstæðisflokkinn við stjórnvölinn er hætta á að vandinn magnist. Formaður Sjálfstæðisflokksins talar um í fjölmiðlum að „ekki sé svigrúm fyrir nýjum rekstrarútgjöldum“, varaformaður Sjálfstæðisflokksins gerði hagræðingu að umtalsefni á síðasta Eldhúsdegi og sagði okkur „einfaldlega ekki hafa efni á því að reka stóru kerfin okkar með óbreyttum hætti“. Allt orðrétt upp úr uppskriftabók hægri manna. Og varaformaður fjárlaganefndar, sem einnig er þingmaður Sjálfstæðisflokksins, bætti svo við fyrir stuttu að ólíklegt væri að Landspítalinn fengi meira fé og talaði um „tækifæri til hagræðingar“.“
Hann segir að hægri menn séu duglegir að beita „niðurskurðarhnífnum“ þegar að þrengir að efnahagsmálum. Logi segir að betra sé að koma sér úr kreppu með því að fjárfesta í hlutum eins og góðri menntun og heilbrigði.
„Við þekkjum allt of vel að niðurskurðarhnífurinn er nærtækasta verkfæri hægri manna í efnahagsþrengingum. En það getur orðið okkur dýrt að spara okkur út úr þessari kreppu. Við þurfum að beita ríkissjóði og vinna okkur gegnum hana á lengri tíma; fjárfesta í heilbrigði, félagslegu öryggi og af bragðs menntun, tryggja aukinn jöfnuð og búa allri þjóðinni tækifæri til velsældar og hamingju til lengri tíma.“