Samband íslenskra framhaldsskólanema krefst þess fyrir hönd framhaldsskólanema landsins að stjórnvöld geri skýrar áætlanir varðandi skólahald í vetur sem er í þá mund að hefjast.
„Samband íslenskra framhaldsskólanema, SÍF, lýsir yfir vonbrigðum með að stjórnvöld hafi ekki birt skýra aðgerðaráætlun um hvernig kennslu í framhaldsskólum skuli háttað, nú þegar haustönn er um það bil að hefjast“
Í tilkynningu SÍF sem send var á fjölmiðla segir að framhaldsskólanemar hafi leitað til skóla sinna eftir svörum um tilhögun haustannar en engin skýr svör hafi þar verið að fá. „sem veldur þeim bæði vanlíðan og kvíða.“
Stjórnvöld hefi ekki haft samráð við fulltrúa nemenda við ákvarðanatöku sem varði þeirra hagsmuni, hvorki í vor né nú og hvorki hvað varði eins metra reglu, fjarnám, fyrirkomulag kennslu eða annað.
Skólarnir hafi gert sitt besta í vor til að bregðast við aðstæðum en þeim aðgerðum hafi þó verið ábótavant. Nemendur hafi haft takmarkað aðgengi í sumum tilvikum að kennurum og upplifðu auknar námskröfur í prófum þar.
Stjórnvöld hafi vitað í sumar að veiran myndi skjóta upp kollinum aftur og því sé ámælisvert að ekki sé búið að gera skýrar áætlanir.
„Þá vill SÍF sjá að nemendum verði leyft að velja hvort þeir mæti í tíma eða séu í fjarfundabúnaði því þótt einhverjir fagni því að skólar haldist opnir með eins metra reglunin, að minnsta kosti enn um sinn, þá eru aðrir nemendur sem óttast smit í fjölmenni og mun því ekki mæta í skólann á meðan ástandið varir.“
Auk þess sé hætta á að nemendur snúi alfarið frá námi. Samkvæmt nýjum tölum Hagstofunnar séu 10 prósent 19 ára ungmenna ekki í námi eða vinnu og það hljóti að vera forgangsmál hjá stjórnvöldum að bæta úr þeirri stöðu.
„SÍF leggur áherslu á mikilvægi þess að skoðað verði vandlega með hvaða hætti stjórnvöld og skólakerfið brugðust við í vor og bera það saman við bæði einkunnir nemenda og brottfallstölur. Ekki þarf að finna upp hjólið í hvert sinn sem Covid tilfellum fjölgar.“
SÍF vilja að stjórnvöld veiti aukið fjármagn til framhaldsskóla til að tryggja meðal annars fjarkennslu, kennslu í iðn- og verkgreinum, mæta þörfum minnihlutahópa og í að efla sálfræðiþjónustu.
„SÍF telur brýnt að sett verði aukið fjármagn í framhaldsskólastigið til að:
– tryggja að fjarkennsla verði eins og best verður á kosið og hægt verði að bjóða nemendum uppá val um skólasókn eða fjarkennslu.
– tryggja að iðn- og verknemar geti haldið áfram sínu námi námi og boðið verði upp á nýja möguleika fyrir þá sem misst hafa starfssamninga.
– mæta þörfum nemenda í minnihlutahópum, svo sem nemenda af erlendum uppruna, nemenda með fatlanir og nemenda með sértæka námsörðugleika.
– efla sálfræðiþjónustu innan framhaldsskólanna til muna.
– veita útskriftarnemum aukinn stuðning á lokametrunum.
– taka vel á móti nýnemum í nýju umhverfi á erfiðum tímum.
– tryggja að hver og einn framhaldsskóli sé undir það búinn að færa kennslu alfarið yfir í fjarnám með stuttum fyrirvara, komi upp aðstæður sem krefjast þess-
– rjúfa félagslega einangrun nemenda“
Stjórnvöld þurfi að vera með sýnilega áætlun sem miði við núverandi aðstæður, breyttar aðstæður og allskonar aðstæður,
„Því Covid 19 er allskonar. Það er engin áætlun að treysta bara á að allir geri sitt besta til að hlýða Víði.“
