Stefnt er að því að ljúka samningum Icelandair Group við lánardrottna fyrir lok vikunnar. Um 15 lánardrottna er að ræða. Viðræðurnar eru komnar mislangt á veg og samningsatriðin eru misjöfn. Starfsfólk Icelandair og ráðgjafar, innlendir og erlendir, koma að viðræðunum.

Morgunblaðið skýrir frá þessu í dag og hefur eftir Boga Nils Bogasyni forstjóra Icelandair. Hann sagði einnig að það væri markmið fyrirtækisins að ljúka samningum við helstu hagsmunaaðila, leigusala og fleiri í þessum mánuði. Samþykkt kjarasamnings við flugfreyjur er að hans sögn mikilvægur hluti af endurskipulagningu félagsins.

Tekist hafi að tryggja samkeppnishæfni og sveigjanleika félagsins um leið og starfskjör flugfreyja og flugþjóna voru varin. Samningar við flugfreyjur og við flugmenn og flugvirkja séu ein af forsendum endurskipulagningar félagsins.

Aðspurður sagði Bogi Nils að gengisveiking krónunnar að undanförnu styrki rekstrargrundvöll félagsins þar sem nær öll laun séu greidd í íslenskum krónum en tekjurnar séu að mestu í erlendri mynt.

Samkvæmt ársfjórðungsuppgjöri Icelandair sem var skilað til Kauphallar Íslands í gær var tap félagsins á öðrum ársfjórðungi 12,3 milljarðar króna. Framboð í farþegaflugi dróst saman um 97% og farþegum fækkaði um 98%. Á fyrri helmingi ársins nam kostnaður félagsins vegna kórónuveirunnar 30,3 milljörðum.