„Við gerum ráð fyrir því að megnið af þeim stjórnarfrumvörpum sem eru tilbúin úr nefndum klárist.“
Hefur blaðið eftir honum. Á meðal þessara frumvarpa er samkeppnislagafrumvarp nýsköpunar- og atvinnuvegaráðherra en í því eru lagðar til breytingar sem miða að því að bæta framkvæmd samkeppnislaga og uppfæra hluta þeirra til samræmis við EES-rétt.
Auk stjórnarfrumvarpa verða átta frumvörp frá þingmönnum afgreidd, eitt frá þingmanni úr hverjum þingflokki. Haft er eftir Birgi að afdrif þeirra verði mismunandi, sum verði samþykkt, önnur verði felld og sumum vísað til ríkisstjórnarinnar.
Fjölmiðlafrumvarpið verður ekki afgreitt að þessu sinni og bíður því til haustsins.
„Í staðinn var samþykkt sérstök fjárveiting til fjölmiðla. Ráðherra var falið að veita styrki vegna ástandsins í eitt skipti en það er auðvitað ekki sambærilegt við frumvarp sem gerði ráð fyrir varanlegum styrk.“
Er haft eftir Birgi.
Ekki er reiknað með að frumvarp Ásmundar Einars Daðasonar, félagsmálaráðherra, um málefni innflytjenda verði afgreitt og sömu sögu er að segja af frumvarpi utanríkisráðherra um skipan sendiherra. Samið var um að það verði tekið á dagskrá í haust og afgreitt fyrir 15. nóvember.