Guðmundur Franklín Jónsson forsetaframbjóðandi segist ætla að virkja 25. grein stjórnarskrárinnar, sem kveður á um að að forseti geti lagt fram frumvörp til Alþingis, og lækka laun forseta Íslands úr 2.985.000 kr. á mánuði í 1.492.500 kr.
Hefur Guðmundur þegar skrifað upp frumvarpið eins og meðfylgjandi mynd sýnir.
Guðmundur segir í myndbandi og færslu á Facebook-síðu framboðs síns að fyrsta verk hans verði að virkja 25. grein stjórnarskrárinnar sem kveður á um að forseti geti lagt fram lagafrumvörp, og lækka laun forsetans um 50%.
Tuttugasta og fimmta grein stjórnarskrárinnar er orðrétt: „Forseti lýðveldisins getur látið leggja fyrir Alþingi frumvörp til laga og annarra samþykkta.“
Þrettánda grein stjórnarskrárinnar kveður hins vegar á um að ráðherra framkvæmi vald forseta: „Forsetinn lætur ráðherra framkvæma vald sitt.“
Ágreiningur er um hvort hægt sé að virkja 25. greinina vegna 13. greinarinnar. Er þar skemmst að minnast að forseti hefur þrisvar beitt 26. gr. stjórnarskrárinnar og neitað að skrifa undir lög. Hún hljóðar svo:
„Ef Alþingi hefur samþykkt lagafrumvarp, skal það lagt fyrir forseta lýðveldisins til staðfestingar eigi síðar en tveim vikum eftir að það var samþykkt, og veitir staðfestingin því lagagildi. Nú synjar forseti lagafrumvarpi staðfestingar, og fær það þó engu að síður lagagildi, en leggja skal það þá svo fljótt sem kostur er undir atkvæði allra kosningarbærra manna í landinu til samþykktar eða synjunar með leynilegri atkvæðagreiðslu. Lögin falla úr gildi, ef samþykkis er synjað, en ella halda þau gildi sínu.“
Ágreiningur er um hvort hægt sé að virkja 25. gr. í raun. Þrettánda greinin hefur ekki komið í veg fyrir að 26. gr. væri virkjuð en nokkur eðlismunur er á því hvað 25. og 26. gr. fela í sér, þar sem sú fyrrnefnda snýst um athöfn, að semja og láta leggja fram lagafrumvarp á Alþingi, en sú síðarnefnda um ákveðið athafnaleysi, að synja um undirskrift á lögum.