„Kaupmáttur mun rýrna, hversu mikið er ómögulegt um að segja,“ segir Ragnar Þór Ingólfsson við Morgunblaðið í dag og er uggandi yfir ástandinu sem hann telur að muni leiða til hækkun verðlags á nauðsynjarvöru.
Hann segir að erlendir birgjar boði nú allt frá 10-100 prósenta verðhækkanir vegna skorts á aðföngum og vinnuafli. Heildsalar hafi tilkynnt um 3-10 prósenta hækkanir og verðlag muni því hækka. Við það bætist svo veiking krónunnar.
Hann telur að meira þurfi að gera fyrir launafólk sem orðið hafi fyrir tekjuskerðingum og tekur undir hugmyndir um að lækka tryggingagjaldið, en tengja þurfi slíkan ríkisstuðning við vísitölu neysluverðs og verðbólgumarkmið Seðlabankans.
Slíkt gæti virkað sem hvati fyrir fyrirtæki til að halda aftur af verðhækkunum og þau þyrftu jafnvel að taka eitthvað tap á sig, líkt og almenningur. Ellegar þyrftu þau að greiða aðstoðina til baka.
Ragnar Þór er fylgjandi lífeyrisleiðinni svokölluðu, að lækka mótframlag vinnuveitenda til launþega úr 11.5% í 8% í þrjá mánuði. ASÍ var hinsvegar ekki tilbúið í þá aðgerð og sagði Ragnar Þór sig úr miðstjórn ASÍ fyrir vikið, auk þess sem Vilhjálmur Birgisson sagði af sér embætti varaforseta ASÍ vegna málsins.