„Við getum siglt okkar lífróður tekjulaus í nokkra mánuði til viðbótar, en það verður sífellt erfiðara þegar í ofanálag koma endurgreiðslur sem og aukin útgjöld, til dæmis mikil hækkun trygginga til Ferðamálastofu.“
Hefur Fréttablaðið eftir Scott Drummond, leiðsögumanni og rekstrarstjóra Hidden Iceland, í umfjöllun um málið í dag. Hann sagði að meira þurfi að koma til ef lítil og meðalstór ferðaþjónustufyrirtæki eigi ekki að fara í þrot.
Í mars var gefin út reglugerð sem heimilar Ferðamálastofu að taka tillit til aðstæðna tryggingarskyldra aðila vegna heimsfaraldursins. Samkvæmt henni er heimilt að áætlun tryggingarskylds aðila fyrir 2020 verði lögð til grundvallar útreiknings tryggingargjalds í stað síðasta árs.
Fréttablaðið segir að samkvæmt upplýsingum frá Ferðamálastofu hafi aldrei staðið til að allar ferðaskrifstofur fengju verulega lækkun á tryggingarfjárhæðinni. Miðað sé við að tryggingin dugi fyrir fullri endurgreiðslu ef til gjaldþrots eða rekstrarstöðvunar kemur.
Haft er eftir Ásberg Jónssyni, framkvæmdastjóra Nordic Visitor, að nú komi gallar núverandi kerfis í ljós. Flestar ferðaskrifstofur séu með eigin gjaldþrotatryggingar en í flestum öðrum Evrópuríkjum séu einhverskonar tryggingasjóðir sem auðvelda ríkinu að grípa inn í.
„Ljóst er að íslenska ríkið þarf að stíga inn og heimila ferðaskrifstofum að endurgreiða í formi inneignar eins og f lestar Evrópuþjóðir hafa nú gert.“
Hann sagði að slík aðgerð sé raunhæf og nauðsynleg núna.
„Ef ríkið gerir ekkert þá fer mikill meirihluti ferðaþjónustufyrirtækja í þrot. Það myndi valda gríðarlegu tjóni á framtíðartekjur landsins og tjóni fyrir neytendur.“
