Í dag birti RÚV fréttina Tryggingastofnun bara búin að borga mömmu Ingu Sæland. Þar var greint frá því að Tryggingastofnun hefði einungis greitt Sigríði Sæland eftir dóm Landsréttar í maí. Hinsvegar hefðu aðrir í sömu stöðu og hún fengið greitt samkvæmt lögum um almannatryggingar. Sú ákvörðun hefur nú verið kærð.
Einnig kemur fram í fréttinni að Sigríður Sæland er móðir þingkonu Flokks fólksins Ingu Sæland, en flokkurinn höfðaði málið og var Sigríður aðili í því vegna þess hve lágar lífeyrissjóðsgreiðslurnar hennar voru.
Í kvöld birti Inga Sæland Facebook-færslu um málið. Þar segir hún að það sé ógeðslegt hvernig málið sé gert tortryggilegt.
„Móðir mín er 82ja ára gömul kona sem lögmaður okkar ákvað að tefla fram í málinu fyrir alla hina rúmlega 30.000. vegna þess að hún átti svo lítinn lífyeirsrétt og þar af leiðandi átti möguleika á gjafsókn. Það er vægast sagt ógeðslegt hvernig er reynt að gera þetta tortryggilegt eins og hér sé einhver skítur á ferð. Ég held að fólki sem hefur þegið peninga vegna þessa dómsmáls væri nær að þakka fyrir frekar en ata mann auri. Ég er gjörsamlega orðlaus.“
Á morgun mun fréttaskýringarþátturinn Kveikur fjalla um málið og hvetur Inga alla til að horfa á þáttinn. Hún er þó ekki par sátt með RÚV, en hún segir fyrirsögnina ekki hæfa Ríkisútvarpinu.
„Hvet ykkur til að horfa á Kveik annað kvöld þar sem fjallað verður um málið, og vitiði bara hvað. Flokkur fólksins mun einnig fara í mál við ríkið ef það ætlar að heykjast við að greiða öllum samkvæmt dómsórinu nema MÖMMU MINNI ! Ef ég vissi ekki betur þá hefði mátt halda að fyrirsögnin kæmi frá slúður sorpriti.“