„Enn ein kolsvört skýrsla – enn einn áfellisdómurinn yfir stjórnkerfi Reykjavíkur,“ segir Vigdís Hauksdóttir, oddviti Miðflokksins í Reykjavík um frumkvæðisrannsóknarskýrslu Borgarskjalasafns Reykjavíkur varðandi braggamálið, en niðurstaða hennar var rædd á fundi borgarráðs í dag.
Í henni kemur fram að starfmenn Reykjavíkurborgar hafi gerst brotlegir við lögum skjalavörslu- og skjalastjórn í meðferð sinni á gögnum málsins, þar sem tölvupóstum var eytt og gögn falin.
Skýrslan var rædd í borgarráði í dag en borgarstjóri hefur haft hana hjá sér síðan 20. desember að sögn Vigdísar:
„Þann 20. desember var skýrslunni skilað til borgarstjóra. Nú er hún loks komin á dagskrá borgarráðs og þá sem svar við fyrirspurn minni. Ekki að frumkvæði borgarstjóra,“
segir Vigdís og vitnar í skýrsluna sjálfa:
„Ekki stendur steinn yfir steini í vinnubrögðum borgarinnar og á einum stað í skýrslunni stendur: „Í svari starfsmanns SEA segir „PDF væri best helst þannig að ekki sé hægt að opna þau“. Þessi samskipti áttu sér stað í september 2018. Í næsta tölvupósti spyr starfsmaður Arkibúllunnar hvort fundargerðirnar séu opinberar og hvort fjölmiðlar eigi rétt á aðgangi að þeim. Starfsmaður SEA svarar því ekki en segist aðeins ætla að vista þær í GoPro en ekki dreifa þeim. Tölvupóstarnir voru vistaðir í GoPro 31. janúar 2019, sex dögum eftir að Borgarskjalasafn hóf athugun þessa. Þetta er hrein og klár hylming á opinberum gögnum,“
segir Vigdís.
Vigdís staðfesti við Eyjuna að hún krefjist afsagnar borgarstjóra vegna málsins en í bókun sinni segir hún að Dagur þurfi að axla ábyrgð á málinu:
„Í mörgum tilvikum voru skjöl vistuð löngu eftir að þau voru búin til og svo mikil var ósvífnin að farið var í að vista mikið magn gagna eftir að Bragginn sprakk í andlit meirihlutans og eftir að Borgarsskjalasafn hóf athugun sína. Niðurstaða skýrslunnar er alveg skýr. Lög voru brotin, lög voru þverbrotin. Borgarstjóri verður að axla ábyrgð sem framkvæmdastjóri borgarinnar.“
