Jón Magnús Jóhannesson, deildarlæknir á Landspítalanum, vill að Bjarni Benediktsson, efnahags- og fjármálaráðherra, segi af sér eftir atburð gærkvöldsins þar sem hann var í 40 til 50 manna samkvæmi. Jón Magnús birti færslu um þetta á Facebook og segir í henni að samkoman sé fáránlegt og skammarlegt brot á sóttvarnareglum sem geti hleypt af stað svokölluðum „ofurdreifiviðburði“ hér á landi.

Jón segir í inngangi greinar sinnar að hann ætli að vera afdráttarlaus og skýr í máli. Færslan hans er annars svohljóðandi:

„Ég vil vera afdráttarlaus, skýr og ótvíræður hérna.

1. Þessi samkoma var fáránlegt, skammarlegt brot á sóttvarnareglum.
2. Þessi samkoma gæti fræðilega hleypt af stað ofurdreifiviðburði COVID-19 hérlendis. Það gæti hreinlega leitt til dauðsfalla. Ég er ekki að ýkja hérna.
3. Skorturinn á sóttvörnum í þessari samkomu, sem var nú þegar að brjóta samkomutakmarkanir, lýsir fáránlegum dómgreindarbresti og virðingarleysi gagnvart alþjóð.
4. Þeir sem skipulögðu þessa samkomu ættu einfaldlega að skammast sín.
5. Téður ráðherra ætti að segja af sér – tafarlaust. Fyrir þátttakendur þessa teitis er þetta skömm en fyrir ráðherra í ríkisstjórn Íslands er þetta algjör forsendubrestur. Það er erfitt að lýsa því nákvæmlega hversu mikið dómgreindar- og virðingarleysi er hér á ferðinni.
6. Ég vil biðla til allra sem hafa skoðun á þessu máli að deila henni.”

https://www.facebook.com/jon.johannesson.7/posts/10218551871331471