Michal Dworczyk, ráðuneytisstjóri forsætisráðuneytisins, sagði við pólska fjölmiðla að umræður um málið standi yfir og það muni væntanlega taka góðan tíma að ræða það og komast að niðurstöðu um nýja nálgun á málinu sem sé erfitt og veki upp sterkar tilfinningar.
Samkvæmt dómi stjórnlagadómstólsins verður ströng þungunarrofslöggjöf landsins þrengd enn frekar. Lögin eru fyrir ein þau þrengstu í Evrópu. Dómstóllinn úrskurðaði að ekki megi framkvæma þungunarrof jafnvel þótt fóstrið hafi greinst með alvarlega eða óviðráðanlega fæðingargalla. Það er einmitt þetta ákvæði sem nær yfir nær öll þungungarrof sem eru framkvæmd á löglegan hátt í landinu. The Guardian skýrir frá þessu.
Dómurinn hefur ekki verið birtur formlega en frestur til þess rann út á mánudaginn og því hefur hann ekki tekið gildi.
„Þetta er greinilega pólitísk ákvörðun. Dóma á að birta án nokkurra tafa. Þetta er lagalegt bragð til að tefja birtinguna,“
sagði Anna Wójcik, hjá lagadeild pólsku vísindaakademíunnar.
PiS flokkurinn (Lög og réttur) hefur verið við völd í Póllandi síðan 2015. Það voru hægrisinnaðir þingmenn sem sendu málið til stjórnlagadómstólsins. Dómurinn hefur eins og fyrr segir vakið mikla reiði sem beinist að PiS og kom þetta flokksmönnum mjög á óvart. Innan flokksins styðja þeir sem eru lengst til hægri niðurstöðuna en kannanir sýna að stór hluti stuðningsmanna flokksins styður ekki herta löggjöf um þungunarrof. PiS er því í erfiðri stöðu.
