Vilhjálmur Birgisson, formaður Verkalýðsfélags Akraness, er með mikilvæg skilaboð til almennings í pistli sem hann birti á Vísi í dag.
Vilhjálmur hvetur alla sem ekki hafa endurfjarmagnað húsnæðislán sín að gera það sem fyrst. Með því sé hægt að auka ráðstöfunartekjur um tugi þúsunda á mánuði.
Bendir hann á að frá því að lífskjarasamningarnir voru undirritaðir hafi Seðlabanki Íslands lækkað vexti sína mikið.
„Vissulega má gagnrýna fjármálakerfið sem hefur því miður ekki skilað þessari miklu lækkun á stýrivöxtum Seðlabankans að fullu til neytenda, en samt hafa húsnæðisvextir lækkað umtalsvert frá undirritun Lífskjarasamningsins.
Það liggur fyrir að fjöldi heimila hefur nýtt sér þessa vaxtalækkun og endurfjármagnað húsnæðislán sín, en því miður hef ég heyrt af fólki sem hefur ekki enn nýtt sér tækifærið til að endurfjármagna lánin á lægri vaxtakjörum.“
Vilhjálmur tekur dæmi um einstakling sem hafði nýlega samband við hann sem er með 24 milljóna verðtryggt húsnæðislán með fasta verðtryggða vexti upp á 4,15%.
„Til að sýna fram á hversu mikinn fjárhagslegan ávinning er um að ræða hjá þessum einstaklingi þá ætla ég að sýna útreikning á því hverju hans heimili hefur orðið af frá því Lífskjarasamningurinn var undirritaður 3. apríl 2019 vegna þess að hann hefur ekki farið í endurfjármögnun.
Af þessu 24 milljóna verðtryggða húsnæðisláni sem ber 4,15% fasta vexti er hann að greiða 83 þúsund í vaxtakostnað á mánuði eða 996 þúsund á ári. Frá því Lífskjarasamningarnir voru undirritaðir hefur neysluvísitalan hækkað um 4,73% sem þýðir að af 24 milljóna húsnæðisláni hefur höfuðstóllinn hækkað um tæpar 1,2 milljónir.
Ef umræddur húsnæðiseigandi hefði hinsvegar endurfjármagnað sig strax í apríl 2019 þá hefði hann getað tekið óverðtryggða húsnæðisvexti á 3,5% sem þýðir að vaxtagjöld á mánuði hefðu verið 70 þúsund sem gerir 840 þúsund á ársgrundvelli.
Þetta þýðir að ef hann hefði endurfjármagnað sig úr verðtryggðu láni á 4,15% vöxtum yfir í óverðtryggða vexti upp á 3,5% þá hefði hann sparað sér 13 þúsund krónur í hverjum mánuði og ekki bara það heldur hefði húsnæðislánið hans ekki hækkað um 1,2 milljónir vegna verðtryggingarinnar!“
Þessi einstaklingur hafi því getað aukið ráðstöfunartekjur sínar um 156 þúsund krónur á ársgrundvelli og sloppið við að horfa upp á hækkun höfuðstóls lánsins um 1,2 milljónir á 18 mánuðum.
Vilhjálmur hvetur því alla sem ekki hafa endurfjármagnað lán sín að gera það hið fyrsta.
„Að þessu sögðu ítreka ég mikilvægi þess að þeir sem ekki hafa endurfjármagnað sig drífi sig í að ræða við sinn lánveitanda, enda gríðarlegir hagsmunir í húfi fyrir skuldsett heimili.“