Staksteinar Morgunblaðsins í dag fara hörðum orðum um yfirlýsingar Loga Einarssonar, formanns Samfylkingarinnar, þess efnis að hart verði látið mæta hörðu í stjórnarskrármálum á Alþingi í vetur.
„Logi Einarsson formaður sagði í gær að í stjórnarskrármálum yrði „bara hreinlega stál í stál í þinginu í vetur“ og boðaði í þeim efnum „bara fullt stríð“!“
Staksteinar hvetja aðra flokka til að forðast að eyða vetrinum í stríðsátök Samfylkingar því taka þurfi höndum saman um að koma þjóðinni í gegnum kórónuveirufaraldurinn:
„Á meðan stríðsdansinn dunar hjá Samfylkingu verður að binda vonir við að aðrir og ögn heilsteyptari flokkar taki höndum saman um að sinna þjóðþrifamálum, ekki síst að koma landinu
klakklaust í gegnum kórónuveirufaraldurinn, í stað þess að sóa vetrinum í stríðsátök Samfylkingar.“
Ekki lítur út fyrir að samstaða sé að nást á Alþingi um breytingar á stjórnarskrá. Bjarni Benediktsson, formaður Sjálfstæðisflokksins og fjármálaráðherra, sagði fyrir skömmu í viðtali við Kastljós að hann væri búinn að eyða of miklum tíma í þetta mál.