Borgarstjórn Reykjavíkur samþykkti einróma í kvöld að ganga til viðræðna við ríkið rekstur á neyslurými í Reykjavík.
Um var að ræða svohljóðandi tillögu sem borgarfulltrúar Samfylkingar, Viðreisnar, Pírata og Vinstri grænna lögðu fram:
„Lagt er til að velferðarsviði verði falið að ganga til viðræðna við heilbrigðisráðuneytið um sameiginlegan rekstur á neyslurými í Reykjavík. Í framhaldinu verði lögð fram kostnaðarmetin tillaga til meðferðar velferðarráðs og samþykktar í borgarráði.“
Skaðaminnkandi þjónusta
Heiða Björg Hilmisdóttir, formaður velferðarráðs borgarinnar, segir þetta ánægjulegt.
“Neyslurými eru skaðaminnkandi úrræði sem dregur úr heilsufarslegum, félagslegum og efnahagslegum afleiðingum notkunar ávana- og fíkniefna án þess endilega að draga úr notkun þeirra. Samkvæmt rannsóknum þá upplifir fólk sem notar vímuefni um æð fordóma í samfélaginu og meðal annars innan heilbrigðiskerfisins. Það eykur á vanda þeirra og skapar aukna hættu að þau leiti sér ekki hjálpar eða stuðnings. Þess vegna fagna ég því mjög að borgarstjórn sameinist um þessa tillögu og vona hún marki upphafið að enn meiri áherslu á skaðaminnkandi þjónustu á vegum Reykjavíkurborgar. “
Alþingi samþykkti í vor frumvarp Svandísar Svavarsdóttur heilbrigðisráðherra um breytingu á lögum um ávana- og fíkniefni. Lagabreytingin felur í sér heimild til sveitarfélaga til að koma á fót lagalega vernduðu umhverfi, neyslurými, þar sem einstaklingar, 18 ára og eldri, geta neytt ávana- og fíkniefna í æð undir eftirliti starfsfólks þar sem gætt er fyllsta hreinlætis, öryggis og sýkingavarna.
Greinargerð með tillögunni sem var samþykkt í borgarstjórn í kvöld má nálgast hér.
Minnkar líkur á veikindum, jafnvel dauða
Í greinargerðinni segir meðal annars:
„Að mati velferðarsviðs Reykjavíkurborgar er það jákvætt skref að heimila með lögum að reka neyslurými fyrir vímuefnanotendur sem nota vímuefni í æð. Þau sjónarmið sem felast í skaðaminnkun eru mjög mikilvæg og nauðsynlegt er að skapa öruggan vettvang fyrir þessa einstaklinga til að koma í veg fyrir aukinn skaða, veikindi og jafnvel dauða viðkomandi.
Það er mat Reykjavíkurborgar að þó að rekstur neyslurýmis falli að langmestu leyti undir heilbrigðisþjónustu þá sé aðkoma velferðarsviðs að þjónustunni mikilvæg þannig að viðkomandi einstaklingar geti á sama stað fengið félagslega ráðgjöf, húsnæðisaðstoð og aðra þjónustu eftir því sem við á hverju sinni. Því er lagt til að velferðarsviði verði falið að stofna til viðræðna við heilbrigðisráðuneytið um aðkomu að rekstri neyslurýmis m.a. með fjárhagslegum stuðningi.