„Það er kaldhæðnislegt að á sama tíma og Nýsköpunarmiðstöð fær viðurkenningu sem stofnun ársins 2020, sé fyrirhugað að leggja hana niður,“ segir Kjartan Due Nielsen, talsmaður starfsmanna hjá Nýsköpunarmiðstöðvar Íslands.
Nýsköpunarmiðstöð Íslands var valin stofnun ársins 2020 í flokki ríkis, sjálfseignarstofnana o.fl. með fleiri en 50 starfsmenn af Sameyki, stéttarfélagi í almannaþjónustu. Valið á stofnunum ársins er byggt á svörum um 12 þúsund starfsmanna í einni stærstu vinnumarkaðskönnun landsins.
Í febrúar kynnti Þórdís Kolbrún Reykfjörð Gylfadóttir, atvinnuvega-, nýsköpunar- og ferðamálaráðherra hugmyndir sínar um að leggja Nýsköpunarmiðstöð niður um áramótin. Þessar fyrirætlanir hafa mætt nokkurri gagnrýni, sér í lagi á þá vegu að greiningarvinna vegna niðurlagningar miðstöðvarinnar hafi verið í mýflugumynd.
Drög að frumvarpi Þórdísar sem miðar að því að leggja niður Nýsköpunarmiðstöð var kynnt í samráðsgátt stjórnvalda þann 28. september. Alls bárust 45 umsagnir áður en lokað var fyrir þær þann 9. október.
Kjartan bendir á að í umsögnum um frumvarpið hafi fjölmargir hagsmunaaðilar bent á að fyrirhuguð áform um að leggja niður Nýsköpunarmiðstöð og stofna einkahlutafélag utan um starfsemina, skapi bæði óvissu og áhættu og gæti haft áhrif á fjármögnun Evrópuverkefna.
Allar umsagnirnar má nálgast í samráðsgáttinni með því að smella hér.
„Auk þess er mjög alvarlegt að það sé ennþá markmiðið að leggja alfarið niður ráðgjöf gagnvart frumkvöðlum og sprotafyrirtækjum á fyrstu stigum- þjónustu sem einkamarkaðurinn er ekki að fara að taka við, vegna eðlilegra hagnaðarsjónarmiða,“ segir hann.
Sjá einnig: Fundur við ráðherra staðfesti áhyggjur starfsmanna
Þórdís Kolbrún kynnti í október á síðasta ári nýsköpunarstefnu fyrir Ísland til ársins 2030 og sagði hún við það tækifæri: „Nýsköpun er ekki lúxus heldur nauðsyn.“ Það var síðan í febrúar á þessu ári sem hún tilkynnti fyrirhugaða lokun Nýsköpunarmiðstöðvar.
Sjá einnig: Opið bréf til ráðherra: Verið að draga úr stuðningi við nýsköpun á landinu öllu
Fyrsta COVID-smitið greindist á Íslandi í lok febrúar og þessi fyrirætlun hennar var því ákveðin áður en faraldurinn fór að hafa áhrif á samfélagið með tilheyrandi atvinnuleysi.
„Það liggur ekki svona mikið á, við viljum frekar að málið sé undirbúið betur og samfella í þjónustu í öllum málaflokkum sé tryggð gagnavart atvinnulífinu. Við starfsmenn myndum fagna heildarendurskoðun á starfseminni, en að leggja hana niður er óheillaskref fyrir nýsköpun í landinu,“ segir Kjartan.
Sjá einnig: Kostar 305 milljónir að leggja niður Nýsköpunarmiðstöð
