Lögmaðurinn Hallmundur Albertsson veltir upp alvarlegum athugasemdum við reglur um einangrun þeirra sem greinast með COVID-19 sjúkdóminn hér á landi. Í grein sem hann ritar í Fréttablaðið bendir Hallmundur á reglur varðandi einangrun COVID-sjúklinga séu strangari hér á landi en á Norðurlöndunum og sé þó ekkert sem bendi til að læknisfræðikunnátta í þeim löndum sé minni en hér á landi.
„Greinist einstaklingur á Íslandi með COVID-19 sjúkdóminn fer hann samkvæmt ákvörðun sóttvarnayfirvalda í fjórtán daga einangrun talið frá þeim degi sem sjúkdómurinn greinist. Hvenær sjúklingur fær fyrstu sjúkdómseinkenni hefur ekki áhrif. Það er jafnframt skilyrði fyrir því að losna úr einangrun að sjúklingur hafi verið einkennalaus í sjö daga,“ bendir Hallmundur á og rekur hvernig þessar reglur eru töluvert vægari í nágrannalöndunum:
„Eins og sést á framangreindri umfjöllun er tímalengd einangrunar verulega meira íþyngjandi á Íslandi en í samanburðarlöndunum. Upphaf einangrunar miðast við þann dag þegar sjúkdómseinkenni koma fram í samanburðarlöndunum en miðast við sýnatökudag á Íslandi. Þar getur munað nokkrum dögum. Þá er tímalengd umtalsvert lengri. Undantekningarlaust skal sá sem greinist á Íslandi sæta að lágmarki fjórtán daga einangrun frá sýnatökudegi en sá frestur er sjö til átta dagar frá því sjúkdómseinkenni komu fram í samanburðarlöndum. Á Íslandi er gerð krafa um sjö einkennalausa daga en tvo til þrjá í samanburðarlöndunum.“
Hallmundur leiðir líkur að að því að þetta kunni að stangast á við meðalhófsregluna sem lögfest er í stjórnsýslulögum:
„Í 12. gr. stjórnsýslulaga nr. 37/1993 er meðalhófsreglan lögfest. Þar er kveðið á um að stjórnvald skuli því aðeins taka íþyngjandi ákvörðun þegar lögmætu markmiði, sem stefnt er að, verður ekki náð með öðru og vægara móti. Skal þess þá gætt að ekki sé farið strangar í sakirnar en nauðsyn ber til.“
Hallmundur bendir á að frelsissvipting sé mikil skerðing á mannréttindum einstaklings og segir: „Þó ekki verði deilt um þá frumskyldu stjórnvalda að verja líf og heilsu almennings þegar glímt er við heimsfaraldur mega þær ráðstafanir sem gripið er til ekki ganga lengra en nauðsynlegt er til að ná því markmiði sem að er stefnt.“
Segir Hallmundur að hafa verði í huga mögulegar afleiðingar sem löng einangrun getur haft á andlega líðan og fjárhag þeirra sem þurfa að þola hana.