Í Staksteinum Morgunblaðsins í dag segir að hlutur launþega í verðmætasköpun sé hvergi meiri en á Íslandi. Þá sé jöfnuður launa mjög mikill miðað við önnur ríki. „Þeir sem tala linnulítið um arðrán, kúgun og auðvald láta slíkar staðreyndir ekki trufla sig,en þeir lifa líka í veruleika sem aldrei var, og enn síður er,“ segir í pistlinum.
Staksteinar styðjast við umfjöllun Viðskiptaráðs um launakostnað á Íslandi. Segir þar að efnahagslegar forsendur kjarasamninga séu brostnar og verðmætin til skiptanna séu 300 milljörðum minni en gert hafi verið ráð fyrir við gerð lífskjarasamninganna.
Síðan segir:
„Þetta var svo sett í samhengi við þá staðreynd að Ísland sé enn hálaunaland þrátt fyrir að krónan hafi veikst og það skýrist af þeim miklu launahækkunum sem hér hafa verið á undanförnum árum.
Þá er bent á að hlutur launþega í verðmætasköpuninni sé hvergi meiri en hér á landi. Ísland var í fyrsta sæti í fyrra þegar hlutur launþega var 61% af því sem framleitt var í landinu. Viðskiptaráð metur það svo að líkur séu á að vegna niðursveiflunnar hafi þetta hlutfall hækkað í 64%, sem eykur forskot Íslands.“
Ljóst er að Morgunblaðið tekur ekki undir með forystumönnum verkalýðshreyfingarinnar sem taka ekki í mál að hróflað verði við launahækkunum lífskjarasamninganna.