Ef kosið yrði til bæjarstjórnar á Seltjarnarnesi í dag myndi Sjálfstæðisflokkurinn missa meirihluta sinn í bænum. Það yrði þá í fyrsta sinn frá stofnun lýðveldisins sem hann væri ekki í meirihluta. Íbúar í bænum er óánægðir með stjórnun bæjarfélagsins og telja flestir að betur megi gera varðandi fjármál hans.

Fréttablaðið skýrir frá þessu. Fram kemur að samkvæmt könnun sem Maskína gerði í júlí og ágúst fyrir félag Viðreisnarfólk á Seltjarnarnesi þá myndi Sjálfstæðisflokkurinn fá um 41% atkvæða ef kosið yrði til bæjarstjórnar nú. Samfylkingin fengi 29%, Viðreisn/Neslisti fengi tæplega 16%, Fyrir Seltjarnarnes tæplega 6% og aðrir 8%.

756 fengu könnunina senda og svöruðu 468 eða 61,9%. Könnunin var gerð með tölvupósti og símhringingum. Í bænum búa um 4.700 manns og svöruðu því um 10% íbúa könnuninni.

Niðurstöðurnar sýna einnig að aðeins 26% bæjarbúa eru ánægðir með stjórnun bæjarins og sama hlutfall treystir Ásgerði Halldórsdóttur, bæjarstjóra, vel. 44% bæjarbúa treysta bæjarstjóranum illa og 42,5% eru óánægð með stjórnun bæjarins.

Nánar er hægt að lesa um könnunina í Fréttablaðinu í dag.