Kostnaður skatgreiðenda vegna utanlandsferða Alþingismanna og forseta Alþingis var alls rúmlega 60 milljónir árið 2018. Þar af nam ferðakosnaður Steingríms J. Sigfússonar, forseta Alþingis, rúmum átta milljónum.
Samtals nemur heildar ferðakostnaður þingmanna og forseta Alþingis yfir hálfum milljarði, eða 557 milljónum á tíu ára tímabili, milli 2009 til 2018, samkvæmt sundurliðuðu svari Steingríms J. Sigfússonar við fyrirspurn Þorsteins Víglundssonar, þingmanns Viðreisnar, um kostnað við utanlandsferðir þingmanna og forseta Alþingis. Kjarninn greinir frá.
Mestur var kostnaðurinn árið 2015, um 74 milljónir, en minnstur árið 2009, 32.5 milljónir.
Við þetta má bæta að skrifstofa Alþingis kolefnisjafnar ekki flugferðir starfsmanna sinna né þingmanna, þeim er það í sjálfsvald sett.
Árið 2019 þótti metár í ferðalögum hjá starfsmönnum í yfirstjórn skrifstofu Alþingis, en um og yfir 30 ferðir voru farnar hjá þeim. Alls 58 utanlandsferðir voru á dagskrá hjá almennum starfsmönnum þingsins í fyrra, samkvæmt frétt Eyjunnar síðan í október og varð það tilefni til gagnrýni, þar sem spurt var hvort ekki væri hægt að nýta fjarfundarbúnað Alþingis betur.
Upphæðirnar eru reiknaðar á verðlagi hvers árs fyrir sig og er kostnaður starfsmanna einnig inni í tölunni sem fóru í ferðirnar.