Fyrirtækið Mountaineers of Iceland er nú til rannsóknar hjá lögreglu vegna vélsleðaferðarinnar á Langjökli á mánudag þrátt fyrir gula veðurviðvörun. Hefur Ferðamálastofa einnig krafið fyrirtækið um skýringar, en 39 manns biðu í marga klukkutíma eftir að björgunarsveitir kæmust til þeirra, eftir hrakningar á jöklinum.
Ráðherra ferðamála, Þórdís Kolbrún Reykfjörð Gylfadóttir, sagði við Stöð tvö í gær að hún gerði þá kröfu að fyrirtæki fylgdu sínum eigin öryggisreglum og vildi vita hvort það hefði verið gert áður en því væri varpað á stjórnvöld, hvort regluverkið væri nægjanlega skýrt.
Gunnar Smári Egilsson, fjölmiðlamaður og sósíalistaforingi, spyr hvernig beri að túlka þessi orð ráðherra:
„Þetta merkir að við erum með ráðherra frá Sjálfstæðisflokknum sem telur að fyrirtæki að fyrst og síðast hafa eftirlit með sjálfri sér. Hún þykist ekki skilja kröfuna um að það sé hlutverk hins opinbera, að hafa eftirlit fyrir hönd almennings og neytenda, jafnvel þótt ríkisvaldið gefi út ferðaskrifstofuleyfi fyrir Mountaineers of Iceland sem önnur sambærileg fyrirtæki.“
Gunnar Smári segir Þórdísi tala um ábyrgð fyrirtækjanna, en minnist ekkert á sína eigin ábyrgð:
„Hér virðist vera á ferðinni dæmi um frjálshyggju-heilaþvott sem hefur gengið of langt, það hefur verið eytt úr heilabúi ráðherrans hvert hlutverk ríkisvaldsins er. Sem skýrir margt um fullkomið verkleysi þessa ráðherra, sem hefur tekist að vera ráðherra ferðamála á mestum sveiflutíma nokkurrar atvinnugreinar (uppbyggingu, áföllum, vanþroska, gjaldþrotum) í sögunni án þess að gera nokkurn skapað hlut. Ráðherrann virðist því ekki haldinn hefðbundnum verk- og ákvörðunarkvíða heldur virðast þær heilastöðvar sem sinna eigi viðbrögðum, áætlunum og framkvæmd hafa verið þurrkaðar út.“