Fréttablaðið skýrir frá þessu í dag og hefur eftir Páli að þau líti þessa grófu mismunun mjög alvarlegum augum og hann hljóti að skoða réttarstöðu Ballarin út frá þvi.
„Það er ekki einu sinni hægt að segja að tilboði hennar hafi verið hafnað. Því var einfaldlega ekki svarað,“
sagði hann um viðtökurnar sem tilboð Ballarin fékk hjá stjórn Icelandair. Hann sagði það einnig hafa komið mjög á óvart hversu ófaglega málsmeðferð Ballarin fékk í útboðinu.
„Ég þori að fullyrða að aðrir sjö þúsund þátttakendur í útboðinu hafi ekki verið krafðir um sams konar sönnun fyrir fjármögnun og hún,“
sagði Páll sem efast um að afstaða Icelandair til Ballarin hafi byggt á fjárhagslegum forsendum.
„Fyrirtækið og forsvarsmenn útboðsins þurfa auðvitað að svara því en staðreyndirnar tala sínu máli. Höfnun þeirra byggir augljóslega á öðrum forsendum en fjárhagslegum sem vekur auðvitað upp margar spurningar sem krefjast svara af hálfu fyrirtækisins, ekki síst í ljósi þess af hvaða stærðargráðu útboðið var og að um eitt af stærstu fyrirtækjum landsins sé að ræða, fyrirtæki með opinbera skráningu í kauphöll sem þar að auki hefur nýverið fengið ríkisábyrgð,“
sagði hann og bætti við að aðgerð af þessari stærðargráðu af hendi fyrirtækis sem er skráð á opinn markað og nýtur opinberrar aðstoðar þurfi að vera hafin yfir vafa.
