Almennu hlutafjárútboði Icelandair lauk klukkan 16 í gær. Umframeftirspurn var í útboðinu og nam hún 85 prósentum og var bæði frá fagfjárfestum og almennum fjárfestum. Útboðsgengið var ein króna á hlut og voru 20 milljarðar nýrra hluta til sölu.

Rúmlega níu þúsund áskriftir bárust að fjárhæð 37,3 milljarða króna. Stjórn félagsins hefur samþykkt áskriftir fyrir 30,3 milljarða eða sjö milljörðum lægri upphæð en heildarfjárhæð þeirra áskrifta sem bárust. Einnig hefur verið ákveðið að nýta heimild til stækkunar útboðsins þannig að fjöldi seldra hluta verður 23 milljarðar. Þetta kemur fram í tilkynningu sem félagið sendi frá sér í nótt.

25 prósenta áskriftarréttur fylgir nýjum hlutum eða sem nemur 5,75 milljörðum hluta. Úthlutunin var í samræmi við skilmála útboðsins og fá núverandi hluthafar, sem tóku þátt í útboðinu, fulla úthlutun í samræmi við hlutafjáreign þeirra.

Um 1.000 starfsmenn skráðu sig fyrir áskrift og fá þeir úthlutað hlutum án skerðingar. Áskriftir að jafnvirði einnar milljóna króna eða lægri upphæða verða ekki skertar en hlutfallsleg skerðing annarra áskrifta í báðum tilboðsbókum er um 37 prósent.

Almennir fjárfestar sýndu félaginu mikinn áhuga og verður eignarhlutur þeirra í félaginu um 50 prósent eftir útboðið en fjöldi hluthafa verður um 11.000.

„Nýr kafli er að hefjast í yfir 80 ára sögu félagsins og ég býð yfir sjö þúsund nýja hluthafa velkomna til liðs við okkur,”

segir Bogi Nils Bogason, forstjóri Icelandair Group, um það traust sem félaginu var sýnt í útboðinu.