Bandalag háskólamanna (BHM) skorar á stjórnvöld að bregðast við þeirri stöðu sem komin er upp á íslenskum vinnumarkaði og kallar eftir tafarlausum aðgerðum. Þetta kemur fram í fréttatilkynningu.

„BHM skorar á stjórnvöld að hækka hámark tekjutengdra atvinnuleysisbóta og lengja tímabil tekjutengingar til að bæta afkomuöryggi fólks sem misst hefur vinnuna vegna samdráttar af völdum kórónuveirufaraldursins.“

BHM vilja enn fremur sjá grunnupphæð atvinnuleysisbóta hækkaða, en hún er í dag 289.510 kr., og einnig að atvinnuleitendum verði gert kleift að stunda nám án þess að það skerði rétt þeirra til atvinnuleysisbóta. Jafnframt kalla BHM eftir aðgerðum til að tryggja listafólki framfærslu.

Meira en 4.500 háskólamenntaðir einstaklingar eru án atvinnu í dag. En BHM bendir á að þetta séu 85% fleiri heldur en í kjölfar efnahagshrunsins 2008.  Þeir sem missa vinnuna í dag verði fyrir miklu fjárhagslegu áfalli og missi af því er jafngildir 55 prósent ráðstöfunartekna að meðaltali á ársgrundvelli.