Þórhildur Sunna Ævarsdóttir, þingmaður Pírata, sagði af sér formennsku stjórnskipunar – og eftirlitsnefndar Alþingis í gær. Bar hún því við að minnihluti nefndarinnar hefði sætt valdníðslu og linnulausum árásum meirihlutans, ekki síst varðandi frumkvæðisathugun á hæfi sjávarútvegsráðherra vegna tengsla hans við forstjóra Samherja.
„En til þess að réttlæta þessa aðför sína kýs meirihluti nefndarinnar að draga persónu mína sífellt niður í svaðið og notað mig sem blóraböggul. Þessi aðferðafræði, að skjóta sendiboðann, er þaulreynd þöggunar- og kúgunnar taktík. Ég mótmæli þessari aðför. Mér misbýður þetta leikrit og ég ætla ekki að taka þátt í því lengur. Meirihlutinn verður að finna sér aðrar átyllur til þess að réttlæta aðför sína að eftirlitshlutverki nefndarinnar og þingsins.“
„Ég tek ekki þátt í því. Ég býð ekki upp á þetta skálkaskjól. Ég býð ekki upp á að meirihlutinn hafi eitthvað skjól í því að níða mig og mína persónu til að forðast það að sinna eftirlitshlutverki þessarar nefndar,“
sagði Þórhildur í ræðustól Alþingis.
Mun Píratinn Jón Þór Ólafsson taka við formannsstöðunni af Þórhildi.
Sigríður Andersen, þingmaður Sjálfstæðisflokksins, sakar Þórhildi um hræsni, þar sem hún hafi sjálf verið býsna óvægin og gefur lítið fyrir upphlaupið hjá stjórnarandstöðunni:
„Ekki liggur enn fyrir hvaða persónulegu árásir fyrrverandi formaðurinn á að hafa orðið fyrir sem ollu því hún fann sig ekki lengur í formannssæti né hvað það er sem hún á að hafa verið „skálkaskjól“ fyrir. Ég veit það eitt að Þórhildur Sunna hefur hvergi dregið af sér í ómálefnalegri gagnrýni á þingmenn, „linnulausum árásum“ eins og hún nú kveinkar sér undan og jafnvel ásökunum um saknæma háttsemi. Það þekki ég persónulega. Það er holur hljómur í þingmönnum pírata og öðrum þingmönnum stjórnarandstöðunnar sem grétu krókudlílatárum í ræðustól Alþingis í gær yfir meðferðinni á þessari „konu“ sem hefði mátt þola „persónulegar árásir“. Menn verða að afsaka þótt ég taki ekki þátt í kertafleytingunni sem trúlega er fyrirhuguð.“
Þá segir Óli Björn Kárason við Morgunblaðið í dag að Þórhildur verði sjálf að nefna þá sem vógu að persónu hennar, þar sem hann kannaðist ekki við slíka hegðun.
Hann telur einnig að Þórhildur sjálf hafi gengið manna lengst hvað ásakanir varðar:
„Ætli það sé ekki bara best að hún bendi á það hvenær vegið hafi verið að hennar persónu. Ég hef ekki verið þekktur fyrir það að hafa uppi stóryrði um einstaka þingmenn eða aðra, það er ekki minn háttur og það hef ég ekki gert. Það hefur enginn sem situr á þingi í dag gengið jafn aggressíft fram með alvarlegum ásökunum á hendur nafngreindum einstaklingum og heilu flokkunum og fráfarandi formaður stjórnskipunar- og eftirlitsnefndar. Ég fullyrði það.“
Óli Björn lét bóka í gær að hann tæki undir fyrri bókanir nefndarmannanna Brynjars Níelssonar, Sjálfstæðisflokki og Þorsteins Sæmundssonar, Miðflokki, sem sögðust ekki styðja Þórhildi sem formann nefndarinnar.
