Gunnar Bragi Sveinsson, þingflokksformaður Miðflokksins og fyrrverandi utanríkisráðherra Framsóknarflokksins, skipaði í ráðherratíð sinni 10 sendiherra milli áranna 2013 og 2016. Þegar hann lét af embættinu voru alls 40 sendiherrar starfandi fyrir Ísland og hafði Gunnar Bragi skipað fjórðung þeirra.

Þetta kemur fram í pistli Björns Jóns Bragasonar í helgarblaði DV, þar sem fjallað er um hvernig sendiherrastöður hafa verið hluti af samtryggingunni meðal stjórnmálamanna.

Sem kunnugt er þá var einn helsti fréttapunktur Klaustursmálsins sá, að Gunnar Bragi taldi sig eiga inni greiða hjá Sjálfstæðismönnum fyrir að skipa Geir H. Haarde sendiherra skömmu eftir landsdómsmálið og gerði sér grillur um að verða sjálfur sendiherra einn daginn, ef marka má orð hans á Klaustri. Hann bar þó þau orð sín til baka, sagði þau lygi, en taldi sig þó hafa allt til brunns að bera til að verða góður sendiherra.

Davíð á metið

Gunnar Bragi á þó ekki metið í skipan sendiherra. Það er Davíð Oddsson, sem á aðeins einu ári tókst að skipa 11 sendiherra, en þar af voru aðeins tveir úr utanríkisþjónustunni.

Af því tilefni sagði Eiríkur Bergmann Einarsson, stjórnmálafræðingur, að utanríkisráðuneytið hefði verið notað nánast eins og:

„…ruslakista fyrir stjórnmálamenn sem hafa komist að endanum á sínum ferli.“