Samkvæmt nýjum umferðarlögum mega hreyfihamlaðir aka um göngugötur, þó svo ófatlaðir megi það ekki. Reykjavíkurborg vill hinsvegar ekki akstur fatlaðra um göngugötur í miðbænum, segir á vef Öryrkjabandalags Íslands. Þar segir að Reykjavíkurborg vilji ráða því sjálf hvort hreyfihamlaðir fái að aka um göngugötur þar sem bílaumferð er bönnuð.
Reykjavíkurborg segir í minnisblaði til umhverfis – og samgöngunefndar Alþingis að sveitarfélögin eigi sjálf að ráða hvort hreyfihamlaðir megi aka um göngugötur og telur borgin „vandséð í hvaða tilgangi hreyfihamlaðir eigi að aka um göngugötur ef þar er ekki að finna bílastæði fyrir hreyfihamlaða eða aðstæður til aksturs.“
Það er að segja, Reykjavíkurborg sér ekki hvaða erindi hreyfihamlaðir eigi á göngugötur þar sem bannað er að keyra, ef ekki séu þar stæði fyrir fatlaða.
Réttur hreyfihamlaðra til aksturs um göngugötur hefur lengi verið baráttumál hjá Öryrkjabandalaginu, sem loksins fékk slíka undanþágu frá akstursbanni um göngugötur í nýju umferðarlögunum.
Samtökin vitna máli sínu til stuðnings í samning Sameinuðu þjóðanna um réttindi fatlaðs fólks, sem tekur sérstaklega á aðgengismálum, þar sem fram kemur að útrýma beri hindrunum og tálmum sem hefta aðgengi fatlaðra:
„Ekki er að sjá að Reykjavíkurborg hafi verið með hugann við þessi réttindi við samningu minnisblaðsins,“
segir á vef ÖBÍ.
Einnig er greint frá þessu í Morgunblaðinu í dag þar sem rætt er við Berg Þorra Benjamínsson, formann Sjálfsbjargar, en hann telur borgina vilja fara „undir radarinn“ í málinu, þar sem ekki hafi verið óskað eftir víðtæku samráði við samtök hreyfihamlaða í málinu. Telur hann skilaboðin vera þau, að fatlaðir séu óvelkomnir.
Í minnisblaði borgarinnar er nefnt að ef hreyfihamlaðir aki inn á göngugöturnar, sé hætt við því að aðrir fylgi í humátt á eftir:
„Ég veit ekki betur en Laugavegurinn og þetta svæði eigi eftir að taka miklum breytingum og mér finnst þessi rök ekki halda vatni fyrr en við sjáum endanlega hvernig Laugavegurinn og önnur svæði muni líta út. Aðalmálið er að ef það er eindregin stefna borgarinnar að gera þetta svæði að lokuðu svæði er borgin að gefa hreyfihömluðum þau skilaboð að við eigum afskaplega lítið erindi í miðborgina,“
segir Bergur við Morgunblaðið.
Kolbrún Baldursdóttir, borgarfulltrúi Flokks fólksins, segir að þetta geti ekki verið svona mikið vandamál þó svo einn og einn bíll læðist inn á göngugöturnar og fordæmir að borgin hyggist setja kantsteina og upphækkanir til að afmarka svæðið. Hún velti því upp í bókun á fundi skipulags- og samgönguráðs, hvort þessar aðgerðir lokuðu fyrir alla möguleika á því að hægt yrði að snúa við ákvörðunum um akstursbann á svæðinu.
Aðgerðir kosta 9.5 milljónir, en einnig hafa verið sett upp fleiri og skýrari skilti á svæðinu, þar sem ökumenn hafa ítrekað keyrt á göngugötunum undanfarið í óleyfi, gjarnan af gömlum vana.
„Er göngugötusvæðið aðeins fyrir útvalda? Ekki ætlað hreyfihömluðum? spyr Kolbrún á Facebook:
Setja á kantsteina og upphækkanir til að afmarka göngugötusvæðið og til að tryggja að enginn handhafi stæðiskorts vogi sér að nýta heimild 10. gr. umferðarlaga að aka göngugötu. Skipulagsyfirvöld eru logandi hrædd um að 8000 handhafar stæðiskorta hópist inn á göngugötur í P merktum bílum sínum.
Skipulagsyfirvöld reyna að fá lagagreininni breytt og hafa sent minnisblað til umhverfis- og samgöngunefndar Alþingi og Samgöngu- og Sveitarstjórnaráðuneytisins dags. 3. apríl 2020.
Fulltrúa Flokks fólksins finnst að skipulagsyfirvöld borgarinnar eigi að láta þetta ógert. Það getur varla verið stórmál þótt einn og einn handhafi stæðiskort aki göngugötu. Aðalatriðið er að aðgengið sé gott og hugað sé að jöfnum rétti allra þegar kemur að aðgengismálum.“
