Hækkandi einingarkostnaður gæti verið ástæðan fyrir því að Icelandair beiti slíkri hörku við að semja við flugmenn og flugfreyjur, þar sem forsvarsmenn félagsins hafa ekki trú á að farþegatekjur félagsins nái aftur sömu hæðum og þegar félagið var rekið með hagnaði.
Þetta segir í fréttaskýringu Kristjáns Sigurjónssonar á vef Túrista.is.
Hann segir hörkuna í kjaraviðræðunum til marks um að einingakostnaður Icelandair sé vandamál í augum stjórnenda félagsins, en forsvarsmenn félagsins hafa sjálfir sagt að ná þurfi niður launakostnaði til að gera félagið fýsilegt í augum fjárfesta í komandi hlutafjárútboði.
Hafa forsvarsmenn Icelandair lagt allt kapp á að samningar náist fyrir 22. maí, þegar hluthafafundur félagsins fer fram. Eru viðræður sagðar á góðu skriði við flugmenn, en annað er uppi á teningnum í viðræðunum við flugfreyjur.
Á vef Túrista segir þó að Icelandair hafi misst flugið þegar kemur að einingatekjum. Árið 2015, sem var metár, hafi einingatekjurnar verið 7,3 dollarar. Ári seinna voru þær 6,9 dollarar og 6,4 dollarar 2017. Reksturinn var þá réttu megin við núllið en tekjur á hvern floginn kílómetra höfðu lækkað um 12 prósent á þessum tveimur árum.
Árið 2018 stóðu einingatekjurnar í stað, en félagið tapaði tæpum sjö milljörðum, sem skýrist af gengi, kjarabótum og samkeppni frá WOW, en það ár sagði forstjórinn Björgólfur Jóhannsson af sér vegna mistaka í sölustarfi og leiðakerfi.
Taprekstur Icelandair í fyrra var um sjö milljarðar en þá hækkaði einingakostnaður upp í 6,6 dollara. Kristján segir þá tölu varla marktæka, þar sem skaðabætur vegna MAX vélanna frá Boeing hafi verið færðar inn sem farþegatekjur, en upphæðin hefur ekki verið gerð opinber. Segir Kristján að því megi fastlega gera ráð fyrir að einingatekjurnar hafi í raun verið mun lægri.
Einingatekjur eru reiknaðar með því að deila farþegatekjum milli ára niður á flogna kílómetra í áætlunarflugi.
Eyjan greindi frá því í gær að raddir væru uppi meðal flugmanna, að hópur innan Icelandair hefði í hyggju að láta félagið verða viljandi gjaldþrota, því þannig mætti komast hjá dýrum kjarasamningum og freista mætti þess að kaupa dýra innviði félagsins á spottprís af þrotabúinu. Prófessor í hagfræði sagði slíka leið vel raunhæfa, það væri bara spurning um hvernig menn reiknuðu sig á hagstæða niðurstöðu.
Orð Bjarna Benediktssonar á þingi í gær eru síst til þess fallin að bera þessa kenningu til baka, en hann sagði stóra verkefnið sem blasti við, vera að byggja upp nýtt flugfélag, tækist Icelandair ekki að bjarga sér út úr fjárhagsvandanum.
[videopress eX7MpvUu]
Þó ber að geta þess að staða Icelandair er það slæm að mögulega ræðst yfirvofandi gjaldþrot þess ekki af meintum vilja forsvarsmannanna, heldur raunstöðu félagsins.
Sjá einnig: Er planið að láta Icelandair fara viljandi í gjaldþrot ? „Algerlega raunhæf hugmynd“ segir hagfræðiprófessor
