Gylfi Magnússon, dósent í viðskiptafræðideild Háskóla Íslands, formaður bankaráðs Seðlabanka Íslands og fyrrverandi efnahags- og viðskiptaráðherra, telur Ísland standa sterkar að vígi nú en í bankakreppunni 2008 en óvissan um framhaldið sé mikil vegna Covid-19.

Þó sé ljóst að miklar þrengingar séu fram undan hjá almenningi og fyrirtækjum:

„Það leikur enginn vafi á því að veirufaraldurinn og viðbrögð við honum munu valda verulegum efnahagssamdrætti. Ekki er ósennilegt að hann verði af svipaðri stærðargráðu og fyrir rúmum áratug. Það er þó verulegur munur á, þessi samdráttur gerist miklu hraðar og jafnframt liggur fyrir að orsökin er tímabundin. Það mun þó taka einhvern tíma fyrir hagkerfið að ná aftur svipaðri efnahagsstarfsemi og fyrir faraldur.“

Eðlilegar aðgerðir

Gylfi segir óvissuna mikla en hann telur aðgerðir ríkisstjórnarinnar eðlilegar í ljósi stöðunnar:

 „Ég sé ekki betur en að aðgerðir ríkisstjórnarinnar séu svona í grófum dráttum eðlilegar í ljósi stöðunnar eins og hún er þekkt núna. Þannig að ég geri ekki athugasemdir við þær. Hins vegar blasir við að það gæti þurft að gera meira síðar og þá fer kannski meira að reyna á hve langt menn vilja ganga í ljósi þess hve miklar skuldir ríkið mun taka á sig.“

Þetta er brot úr stærri grein sem birtist í helgarblaði DV um hvernig fræðimenn í stjórnmálafræði, mannfræði og hagfræði meta áhrif kórónuveirunnar.