„Ég á erfitt með að verjast þeirri hugsun að alltof mikil orka fari í að ná umræðunni ofan í skotgrafir og efna til átaka þar sem efnislegt samtal hefði skilað miklu betri árangri. Ég vildi óska að sami kraftur væri settur í samningagerðina og ítrekað virðist fara í skeytasendingar í minn garð og samninganefndar borgarinnar,“

segir Dagur B. Eggertsson, borgarstjóri í færslu á Facebook, hvar hann deilir frétt á vef Reykjavíkurborgar þar sem lægstu launin eru sögð hækka mest í nýjasta tilboði samningarnefndar Reykjavíkurborgar í kjaradeilunni við Eflingu.

Þar er jafnframt lýst vonbrigðum um að ekki hafi náðst meiri árangur á samningafundi dagsins og furðu lýst á þeirri „tilraun“ Eflingar að „draga í efa framkomin tilboð borgarinnar um verulegar kjarabætur fyrir starfsfólk Eflingar hjá Reykjavíkurborg.“

Gæti ekki verið skýrara

Dagur ítrekar að tilboðið sem hann setti fram í Kastljósþætti í síðustu viku, væri það sama og samninganefndin hefði sett fram, þrátt fyrir orð Eflingar um hið gagnstæða:

„Nú síðast hefur forysta Eflingar reynt að sá tortryggni um hvort tilboð Reykjavíkurborgar varðandi starfsfólk í leikskólum sé ekki það sama við samningaborðið og kynnt hefur verið opinberlega, þar með talað í Kastljós-viðtali við mig í síðustu viku. Því er einfalt að svara: að sjálfsögðu. Tilboð borgarinnar myndi hækka meðal grunnlaun almennra starfsmanna á leikskólum úr 310 þús í 420 þús á mánuði. Ofan á þessar tölur koma álagsgreiðslur sem hafa verið greiddar á leikskólum og eiga að halda áfram og verða heildarlaun í lok samningstímans því 460 þús. á mánuði. Þetta er gott tilboð um mikla hækkun lægstu launa sem er hér með ítrekað. Fyrir ófaglærða deildastjóra á leikskóla úr röðum Eflingar myndu grunnlaun hækka í 520 þús. að meðaltali á mánuði. Með áðurnefndum álagsgreiðslum eru heildarlaun þessa hóps 572 þús á mánuði. Getur þetta verið skýrara?“