Björgólfur Jóhannsson, starfandi forstjóri Samherja, er meðal þeirra níu sem sækjast eftir stjórnarsetu í tryggingarfélaginu Sjóvá, hvers aðalfundur fer fram þann 12. mars. Kjarninn greinir frá.

Hyggst björgólfur hætta hjá Samherja fyrir lok mars, samkvæmt RÚV. Björgólfur gaf það út um miðjan desember að hann hygðist hætta sem forstjóri Samherja á fyrsta ársfjórðungi þessa árs, en í janúar sagði hann í viðtali að hann yrði líklega ekki lengur en fram á mitt þetta ár.

Býst hann við að Þorsteinn Már Baldvinsson taki aftur við forstjórastarfinu, en það sé ekki hans ákvörðun, heldur stjórnar.

Tilnefningarnefnd Sjóvá mælir með Björgólfi, ásamt Guðmundi Erni Gunnarssyni, fyrrverandi forstjóra VÍS, Hildi Árnadóttur, sem er núverandi stjórnarformaður Sjóvár, Inga Jóhanni Guðmundssyni, stjórnarmanns, og Ingunni Agnes Kro lögmanni. Fimm fá sæti í stjórninni, en alls sóttust 14 eftir stjórnarsetu í upphafi, en fimm drógu framboð sitt til baka þegar ljóst var að ekki yrði mælt með þeim af nefndinni.

Björgólfur var kosinn stjórnarformaður Sjóvá í mars í fyrra, áður en hann tók við forstjórastarfinu hjá Samherja, en sagðist þá ætla að víkja tímabundið úr stjórn vegna anna.

Stærsti eigandi Sjóvár er SVN eignafélag, sem Síldarvinnslan á tæplega 14% hlut í, en hlutur Samherja og tengdra félaga í Síldarvinnslunni er alls 49.9 prósent. Fyrrverandi forstjóri Samherja, Þorsteinn Már Baldvinsson, var lengi vel stjórnarformaður Síldarvinnslunnar og var Björgólfur einnig framkvæmdastjóri þar.