Ég mæli sérstaklega með þessu viðtali úr Silfri síðasta sunnudags. Það er við Héðin Unnsteinsson og þarna er að finna greiningu á því sem hefur farið úrskeiðis í íslenska stjórnkerfinu og tillögur hans til úrbóta.
Héðinn fjallar bæði um ástandið hjá ríkinu og sveitarfélögum. Hjá ríkinu er það ráðherraræðið sem er ein meinsemdin, ráðuneytin vinna ekki saman, það fer í gang alls kyns stefnumótunarvinna með fyrirheitum um bót og betrun, en þegar allt kemur til alls breytist litið. Héðinn líkir því við að ráðuneytin vinni í eins konar sílóum – starfsemin er lóðrétt en ekki lárétt eins og sést á þessari skýringarmynd sem Rán Flygenring gerði.
Síðan eru það sveitarfélögin sem eru alltof mörg, ráða illa við verkefni sín – þyrftu samkvæmt Héðni að vera ekki fleiri en átta til tólf. Þá væri hægt að flytja fleiri verkefni til sveitarfélaganna, gera þau skilvirkari án þess þó að missa nándina við íbúana. En tregðulögmál valda því að þetta er illframkvæmanlegt, þótt nú sé búið að setja í gang áætlanir um nokkra fækkun sveitarfélaga.
Héðinn telur að sé hægt að einfalda kerfið, bæði hjá ríki og sveitarfélögum, notendum og skattgreiðendum til hagsbóta. Hlustið endilega á það sem hann hefur að segja.
