Bolli Héðinsson hagfræðingur skrifar háðslega grein í Kjarnann um skilning Vinstri grænna á veiðigjöldum og grundvallaratriðum hagfræðinnar í dag. Hún byggist að vísu aðeins á samtali hans við ónefndan frammámann í VG, sem hann tekur fram að sé ekki talsmaður flokksins.

En ef heimfæra má skilning þessa frammámanns í VG á veiðigjaldinu og kaupmætti á þingflokkinn, er kannski ástæða til að hafa áhyggjur, ef marka má skrif Bolla:

„Ég spurði hann hvort Vinstri græn ætl­uðu ekki að fara að færa eitt­hvað af arð­inum af fisk­veiði­auð­lind­inni frá Sam­herja til þjóð­ar­inn­ar, sem hins rétt­mæta eig­anda auð­lind­ar­inn­ar? Svarið sem ég fékk var: „Veiði­gjaldið er nær því sem það ætti að vera en áður.“ Þá spurði ég hvernig hann vissi hvert veiði­gjaldið ætti að vera en fékk ekki svar við því.

Hér eru merk tíð­indi á ferð­inni. Eru til upp­lýs­ingar hjá Vinstri grænum þar sem kemur fram hver fjár­hæð „rétts“ veiði­gjalds á útgerð­ina á að vera og gildir þetta e.t.v. um fleira? Ef maður hyggst leigja út íbúð­ina sína er þá hægt að hringja á flokks­skrif­stof­una og fá upp­lýs­ingar um hvað sé hið „rétta“ verð sem ætti að leigja íbúð­ina á?“

spyr Bolli.

Engar raunhækkanir hjá ríkinu ?

Hann ræddi einnig um gjaldhækkanir ríkis og sveitarfélaga um áramótin við þennan frammámann í VG, sem munu augljóslega rýra þann kaupmátt sem lífskjarasamningarnir höfðu í för með sér, hefði einhver haldið:

„Þessar gjalda­hækk­anir eru til að tryggja að opin­ber þjón­usta haldi í við verð­lag og því í sam­ræmi við það sem byggt er á lífs­kjara­samn­ingn­um. Hér er ekki um raun­hækk­anir að ræða,“

sagði frammámaðurinn í VG að sögn Bolla, sem telur þetta svar kúnstugt:

„…því öllum launa­mönnum er ljóst að það er til lít­ils að fá launa­hækkun ef flest það sem á að kaupa fyrir launa­hækk­un­ina hækkar í verði. Þá er launa­hækk­unin til lít­ils og kjara­bótin eng­in. Kaup­mátt­ur­inn batnar ekki nema launin hækki en kostn­að­ur­inn við að lifa hald­ist óbreytt­ur.

Sam­kvæmt skiln­ingi þessa frá­má­manns Vinstri grænna þá gildir þetta ekki um verð­hækk­anir hins opin­bera. Ein­hvern veg­inn sér hann fyrir sér að hærri kostn­aður við að fram­fleyta sér og sínum rýri samt ekki kjör launa­fólks af því að þetta eru kostn­að­ar­hækk­anir hins opin­bera. Þetta er alveg ný túlkun á kaup­mætti og hvernig kaup­máttur helst þrátt fyrir að dýr­ara sé að fram­fleyta sér.“