Ég er stundum sagður vera 101 maður í húð og hár og það er kannski rétt, ég er alinn hérna upp og hef búið hérna alla tíð. Bjó aðeins í útlöndum og svo mjög stuttan tíma í 105, það er Hlíðunum. Festi engar rætur þar.
En það er samt svo að í mínu starfi í sjónvarpi hef ég einna mesta ánægju af því að fara út á land og vinna efni. Undanfarin ár hef ég gert bókmenntatengd innslög út um allt land, ég hef farið á Vestfirði, Snæfellsnes, um Suðurlandið, til Eyja, í Húnavatnssýslur og Skagafjörð. Í Suðursveitina, í Hallormsstað og Skriðuklaustur.
Ég er nýkominn úr ferð þar sem við fórum um Aðaldal, á Húsavík, Melrakkasléttu, Þórshöfn, Langanesströnd, Vopnafjörð, Jökuldalsheiði, Dettifoss og Mývatn.
Ég held reyndar að ég hafi náð að loka hringnum að þessu sinni og koma í alla bæi og þorp á Íslandi. Ég er heldur ekki hættur. Eftir áramót verða sýndir þættir sem ég hef unnið að nokkuð lengi og fjalla um Siglufjörð. Og það hafa verið uppi áform um þáttaröð sem fjallar um byggingasögu nokkurra merkra bæja út um landið.
En þetta er auðvitað heldur smátt miðað við þjóðlífsþáttinn Landann sem hefur verið ein skrautfjöður Ríkisútvarpsins undanfarin ár. Í dag horfir maður á sólarhrings langa útsendingu Landans á víð og dreif um landið. Þetta er ekki bara bráðsniðugt, heldur er útkoman fersk og skemmtileg!