Fréttablaðið skýrir frá þessu í dag og segist hafa heimildir fyrir að að þessi þrjú hafi verið metin hæfust. Blaðið segir að umsækjendur hafi fengið bréf frá dómnefndinni um niðurstöðu hennar og hafi þeir getað gert athugasemdir við mat hennar en frestur til þess rann út á föstudaginn. Hugsanlega muni niðurstaða hennar liggja fyrir nú í vikunni.
Markús Sigurbjörnsson og Viðar Már Matthíasson ákváðu að láta af embættum sínum á árinu en þeir urðu báðir 65 ára á árinu. Dómurum verður nú fækkað um einn og því verður aðeins einn skipaður nú í stað Markúsar og Viðars.
Aðeins ein kona, Gréta Baldursdóttir, er nú dómari við réttinn og segir Fréttablaðið að viðmælendur þess um málið telji líklegt að Ingveldur verði skipuð dómari við réttinn í ljósi hins mikla kynjahalla. Hún var dómari við Héraðsdóm Reykjavíkur áður en hún var skipuð dómari við Landsrétt. Hún var einnig settur dómari við Hæstarétt um hríð vegna mikils álags á réttinn í kjölfar hrunsins.