Út er komin bókin Halldór Ásgrímsson – ævisaga, veglegt rit upp á um 600 blaðsíður eftir Guðjón Friðriksson. Halldór var formaður Framsóknarflokksins, sjávarútvegsráðherra og forsætisráðherra.
Andlát Halldórs Ásgrímssonar var óvænt þó að hann hafi glímt við heilsubrest síðustu árin. Halldór lést föstudaginn 15. maí árið 2015 en þá voru hann og eiginkona hans, Sigurjóna Sigurðardóttir, stödd í sumarbústað við Álftavatn. Um atvikið segir svo í bókinni:
„Halldór hafði skroppið á Selfoss og var nýkominn til baka ásamt eldri bróður Sigurjónu. Einnig var systir hans stödd í bústaðnum og yngri bróðir í nærliggjandi bústað. Systkinin og makar þeirra ætluðu að eyða kvöldinu saman. Hann ákvað að leggja sig en á meðan fór Sigurjóna í sturtu. Þar var hún þegar hún heyrði dynk. Halldór hafði verið kominn fram úr en fengið hjartaáfall, dottið fram fyrir sig á gólfið og var meðvitundarlaus. Sigurjóna segir:
„Við hringdum þegar í Neyðarlínuna og vorum síðan í beinu sambandi við hana og okkur leiðbeint hvernig við ættum að hnoða til að koma í hann lífi. Þegar sjúkrabíllinn kom tókst í smástund að lífga Halldór við en þyrla kom í Þrastarlund til að sækja hann. Hann vaknaði þó ekki aftur og lést tveimur dögum síðar.“
Útför Halldórs fór fram frá Hallgrímskirkju fimmtudaginn 28. maí 2015 að viðstöddu miklu fjölmenni. Séra Pálmi Matthíasson jarðsöng. Meðal kistubera Halldórs voru Sigmundur Davíð Gunnlaugsson, núverandi formaður Miðflokksins, og Davíð Oddsson, fyrrverandi formaður Sjálfstæðisflokksins og forsætisráðherra, helsti samstarfsmaður Halldórs í gegnum þrjár ríkisstjórnir.