Í þessari frétt segir að Tom Hanks hafi verið gerður að sérstökum heiðurs-Grikkja. Tom Hanks og kona hans Rita Wilson, sem er af grískum ættum, eiga hús á eyjunni Antiparos. Hún er gengt eyjunni Folegandros sem þar sem við fjölskyldan dveljum árlega, maður getur horft þar yfir.
Hugtakið philhellene er til í mörgum tungumálum – það þýðir í raun eitthvað svipað og Íslandsvinur – en rætur þess eru gamlar og merkingin djúp, þeir sem fengu þennan titil voru aðallega unnendur klassískrar grískrar menningar og þeir sem studdu sjálfstæði Grikklands á 19. öld, sá frægasti er Byron lávarður sem fór beinlínis til Grikklands til að berjast fyrir sjálfstæðinu og andaðist þar.
Við höfum stundum orðið vör við ferðir áðurnefndra hjóna, en ekki hitt þau í eigin persónu. Það gæti auðvitað verið gaman því við höfum haft spurnir af því að þetta séu dæmalaust ágætt fólk. Ætli Hanks fari ekki nærri því að vera vinsælasti Bandaríkjamaður sem uppi er?
En í fyrrasumar fengum við símtal, það var frá bandarískum vini, erindi hans var að spyrja hvort við gætum ráðlagt Tom og Ritu – þannig var það orðað – hvar best væri fyrir þau að borða á Folegandros. Fylgdi með sögunni að þau vildu ekki vera á einu af aðaltorgunum þar sem þau myndu vekja of mikla athygli.
Sigurveig kona mín leysti úr málinu og benti á stað sem nefnist Blue Cusine. Þar er framreiddur grískur matur en á nútímalegan hátt.
Annars er eyjan sem betur fer ekki athvarf ríka og fræga fólksins, ekki fremur en Antiparos þar sem Hanks á sitt hús. Flest það lið fer til Mykonos, á eyju sem er best að forðast í lengstu lög, má þó stundum brosa út í annað eins og að sjónvarpsþáttaröð sem fjallaði um klúbb sem leikkonan Lindsey Lohan rak þar á einni ströndinni. Sá var bráðfyndinn á sinn hátt – en alveg óvart. Maður hló semsagt á vitlausum stöðum – því miður hefur framleiðslu þáttanna verið hætt.