„Öryggishlutverk Ríkisútvarpsins er gjarnan ofarlega á blaði þegar talið berst að markmiðum hins opinbera með rekstri fjölmiðils í almannaeigu. En hvert er öryggishlutverkið? Stutt skoðun sýnir ekki að það sé verulegt, umfram þá þjónustu sem Stöð 2, Vísir og Bylgjan hafa veitt um áratugaskeið,“
segir Þórir Guðmundsson, ritstjóri fréttastofu Stöðvar 2, Vísis og Bylgjunnar, í grein á Vísi í dag í tilefni af umræðunni í kjölfar óveðursins í síðustu viku.
Samkvæmt samningi ríkisins við RÚV skal RÚV tryggja nauðsynlega öryggisþjónustu með upplýsingamiðlun og öryggisstefnu.
Þórir segir Bylgjuna gegna sérstöku hlutverki þegar mikið liggi við, sem vinsælasta útvarpsstöð landsins en henni sé einnig dreift til fleiri landsmanna en nokkur önnur stöð.
„Með öðrum orðum, þá er lítill raunverulegur munur á upplýsingamiðlun stóru fjölmiðlanna af neyð eða vá og fátt sem bendir til að fréttastofa RÚV hafi þar veigameira hlutverk en aðrar stærri fréttastofur hér á landi.“
Þórir segir að huga verði að því hverju eigi að ná fram nú þegar nýr þjónustusamningur ríkisins við RÚV sé í bígerð og skilgreina þurfi hvaða markmiðum eigi að ná fram varðandi öryggi í fréttaflutningi á neyðartímum:
„Mikið skortir á að það sé gert í núverandi þjónustusamningi. Fyrst og síðast hlýtur hið opinbera að vilja koma upplýsingum á framfæri, annars vegar við fólk sem er statt á neyðarsvæði eða/og við allan almenning sem þarf að fá upplýsingar um neyðina. Ef þetta eru markmiðin þá eru skilvirkari leiðir að þeim en að halda úti stórri, ríkisrekinni fréttastofu. Eða, svo það sé orðað með öðrum hætti, þá kunna að vera ástæður til að halda uppi stórri, ríkisrekinni fréttastofu en óskilgreint og innantómt öryggishlutverk ætti ekki að vera ein þeirra.“
