„Enn einu sinni er friðhelgi heimilis mín rofin af skrifstofu borgarstjóra og borgarritara. Enn einu sinni fæ ég ábyrgðarbréf seint að kvöldi úr ráðhúsinu og kvitta fyrir móttöku þess,“ segir Vigdís Hauksdóttir, borgarfulltrúi Miðflokksins. Hún hefur verið sökuð um einelti vegna gagnrýni hennar á embættismenn borgarinnar. Eineltiskvörtunin velkist áfram um í kerfinu og í kvöld fékk Vigdís ábyrgðarbréf frá borginni þar sem segir meðal annars:
„Gögn málsins voru send þér hinn 19. júní 2019 og 24. september 2019, þar sem þér var jafnframt gefinn kostur á að koma á framfæri athugasemdum sem og andmælum innan ákveðins tímafrests. Engin viðbrögð bárust teyminu frá þér og telja undirrituð því ljóst að þú munir ekki taka þátt í könnun málsins. Engin frekari rannsókn eða vinnsla máls er því möguleg.“
Eineltisteymi borgarinnar segist jafnframt ætla að senda erindi lögmanns um meint brot Vigdísar á siðareglum til siðanefndar Sambands íslenskra sveitarfélag til meðferðar.
Vigdís segir um efni bréfsins og vinnuandann í Ráðhúsinu:
„Efni þess er í megin dráttum uppgjöf og viðurkenning á að rannsóknarréttur ráðhússins var aldrei löglegur eins og ég marg benti á. Nú er siðanefnd Sambands íslenskra sveitarfélaga att á mig í annað sinn. Ég tek heilshugar undir með Guðmundi Hálfdánarsyni, prófessor í sagnfræði við HÍ þegar hann sagði í blaðaviðtali að erfitt væri að vera í ráðhúsinu því samskiptin þar eru svo eitruð. Það fann ég strax á mínum fyrsta degi þegar ég steig þar inn fyrir dyr. Samskiptin eru ekki bara eitruð – þau eru sjúkleg.“