Miðvikudagur 20.nóvember 2019
Eyjan

Íbúðalánasjóður úthlutar 3,2 milljörðum til húsnæðis um allt land

Ritstjórn Eyjunnar
Föstudaginn 8. nóvember 2019 10:19

Ekki missa af Helstu tíðindum dagsins í pósthólfið þitt

Lesa nánar

Íbúðalánasjóður úthlutaði í dag 3,2 milljörðum króna í stofnframlög til byggingar og kaupa á sjötta hundrað leiguíbúðum víðsvegar um landið. Leiguíbúðirnar verða í 15 sveitarfélögum en þorri þeirra verður á höfuðborgarsvæðinu. Fjármunirnir eru hugsaðir til að styðja við framboð ódýrra leiguíbúða fyrir almenning og verða nýttir til byggingar á 410 íbúðum og kaupa á 121 íbúð, samkvæmt tilkynningu.

Milljarðarnir þrír eru svokölluð stofnframlög ríkisins sem renna til byggingaraðila í almenna íbúðakerfinu. Hugmyndin er að fólk sem leigir íbúð í kerfinu verji talsvert minna af ráðstöfunartekjum heimilisins til húsnæðis og losni við það óöryggi sem fylgir því að leigja á frjálsa leigumarkaðnum.

Nú þegar hafa um þúsund manns flutt í slíkar íbúðir og þessir íbúar munu geta dvalið í þeim svo lengi sem tekjur og eignir heimilisins eru undir viðmiðunarmörkum almenna íbúðakerfisins.

Vegna mikillar eftirspurnar ákvað ríkisstjórnin, að tillögu félagsmálaráðherra, að auka framlögin til almenna íbúðakerfi fyrr á þessu ári. Þá verða framlög næsta árs einnig aukin um 2,1 milljarð og verða því um 3,8 milljarðar í heildina á árinu 2020.

Mikilvæg viðbót

 „Þessar ríflega 530 íbúðir sem verið var að úthluta til nún eru gríðarlega mikilvæg viðbót við almenna íbúðakerfið. Ég er ánægður með að ríkisstjórnin hafi samþykkt að setja aukið fjármagn í stofnframlögin. Í almenna íbúðakerfinu verða í framtíðinni þúsundir íbúða þar sem leiga er bæði lægri og húsnæðisöryggi meira en gengur og gerist. Það er mikilvægt fyrir samfélagið allt að það séu ekki heimili í landinu á heljarþröm vegna hárrar leigu og öryggisleysis í húsnæðismálum. Fólk í slíkum aðstæðum gefst annars bara upp, flýr land eða hrökklast af vinnumarkaði, því launin fara öll í að hafa þak yfir höfuðið. Með því að mæta þessari grunnþörf fólks fyrir húsnæði við hæfi þá spörum við útgjöld og tekjutap á fjölmörgum öðrum sviðum. Flestir stjórnmálamenn eru sem betur fer farnir að skilja þetta,“

segir Ásmundur Einar Daðason, félagsmálaráðherra

Meirihluta umsóknar samþykktar
Alls bárust Íbúðalánasjóði 49 umsóknir um samtals 6,3 milljarða króna en ríflega helmingur þeirra, eða 26 umsóknir, voru samþykktar ýmist að fullu eða að hluta til. Sveitarfélög nutu forgangs við úthlutunina og hlutu alls um 800 milljónir kr.

Fjöldi íbúa þegar fluttur inn í leiguíbúðir í almenna kerfinu
Meðal þeirra sem fengu úthlutað nú var byggingarfélagið Bjarg, sem er alls með um 1000 íbúðir í byggingu eða þróun. Bjarg hefur þegar hafið útleigu á 114 íbúðum þar sem heildaríbúafjöldinn er um 300 manns. Íbúðum Bjargs er úthlutað eftir því hvenær fólk skráði sig á biðlista hjá félaginu en það er í sameiginlegri eigu launþegasamtakanna ASÍ og BSRB.

Sístækkandi hópur mun geta nýtt sér þennan hagkvæma kost á húsnæðismarkaði á næstunni en á síðustu þremur árum hefur Íbúðalánasjóður úthlutað fyrir hönd ríkissjóðs um 11,7 milljörðum króna í stofnframlög til byggingar og kaupa á rúmlega 2.100 íbúðum. Með byggingu fjölda nýrra hagkvæmra leiguíbúða er ætlunin að slá á þann mikla húsnæðisvanda sem lægri og millitekjuhópar hafa mátt stríða við að undanförnu. Þessi nýja húsnæðislausn felur í sér að félagasamtök, sveitarfélög og lögaðilar sem uppfylla ákveðin skilyrði fá fjárhagslegan stuðning ríkis og sveitarfélaga til að standa að uppbyggingu leiguhúsnæðis.

Framlög til íbúða í 15 ólíkum sveitarfélögum í þessari úthlutun
Sveitarfélögin sem fá úthlutað að þessu sinni eru Akraneskaupstaður, Akureyrarbær, Borgarfjarðarhreppur, Dalabyggð, Garðabær, Hafnarfjarðarkaupstaður, Húnaþing vestra, Reykhólahreppur, Reykjanesbær, Reykjavíkurborg, Suðurnesjabær, Sveitarfélagið Ölfus, Tálknafjarðarhreppur, Vopnafjarðarhreppur og Þingeyjarsveit.

Af íbúðunum 531 eru flestar á höfuðborgarsvæðinu, eða 452. Tíu íbúðir eru á Austurlandi, 18 á Norðurlandi eystra, 6 á Norðurlandi vestra, 4 á Suðurlandi, 13 á Suðurnesjum, 15 á Vestfjörðum og 13 á Vesturlandi.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Eyjan
Í gær

Skrifar um svarta sögu Samherja – „Ekki sagan um duglegu drengina“

Skrifar um svarta sögu Samherja – „Ekki sagan um duglegu drengina“
Eyjan
Í gær

Morgunblaðið hæðist að borgarstjóra –„Þetta er alger draumatillaga“

Morgunblaðið hæðist að borgarstjóra –„Þetta er alger draumatillaga“
Eyjan
Fyrir 2 dögum

Forstjóri Samherja segir að niðurstöður rannsóknar verði birtar – „Það vilja allir vinna heiðarlega“

Forstjóri Samherja segir að niðurstöður rannsóknar verði birtar – „Það vilja allir vinna heiðarlega“
Eyjan
Fyrir 2 dögum

Tekist á um Samherjamálið í Silfrinu – Helga Vala segir frystingu eigna eðlilega aðgerð

Tekist á um Samherjamálið í Silfrinu – Helga Vala segir frystingu eigna eðlilega aðgerð
Eyjan
Fyrir 3 dögum

Ágúst Ólafur ósáttur við að framlög séu ekki hækkuð til SÁÁ – Fór sjálfur í meðferð – „Þetta er ekki flokkspólitískt mál.“

Ágúst Ólafur ósáttur við að framlög séu ekki hækkuð til SÁÁ – Fór sjálfur í meðferð – „Þetta er ekki flokkspólitískt mál.“
Eyjan
Fyrir 4 dögum

Vilja ekki svara fyrirspurnum um mútugreiðslur né opna bókhaldið

Vilja ekki svara fyrirspurnum um mútugreiðslur né opna bókhaldið
Eyjan
Fyrir 4 dögum

Sjáðu hvernig Bjarni Ben ætlar að koma í veg fyrir skattsvik

Sjáðu hvernig Bjarni Ben ætlar að koma í veg fyrir skattsvik