Sex sviðsstjórar hjá Reykjanesbæ fá glaðning í aðdraganda jólanna, samkvæmt héraðasmiðlinum Suðurnes.is, en laun þeirra hafa verið hækkuð um 8.9 prósent eða 122 þúsund krónur. Verða mánaðarlaun þeirra eftir hækkun ein og hálf milljón króna.
Samkvæmt Kjartani Má Kjartanssyni bæjarstjóra er hækkunin gerð til að samræma laun starfsfólksins við laun sviðstjóra annarsstaðar á landinu.
Meirihlutinn í Grindavík, sem samanstendur af Sjálfstæðisflokknum, Framsókn og Samfylkingu, ákvað á bæjarstjórnarfundi þann 26. nóvember að hækka laun sín (bæjarfulltrúa) um 30 prósent. Laun forseta bæjarstjórnar og formanns bæjarráðs hefðu með breytingunni orðið 500 þúsund á mánuði miðað við fjóra fundi á mánuði.
Var sú ráðstöfun harðlega gagnrýnd af minnihlutaflokkunum og sagði fulltrúi Miðflokksins:
„Vænta má að kjósendur hafi gert ráð fyrir því þegar þeir gengu til kosninga vorið 2018 að fjármunum bæjarins yrði forgangsraðað í samræmi við stefnuskrá flokkanna en ekki í eigin vasa. En hækkun þessi mun kosta bæjarfélagið þó nokkuð á annan tug milljóna á ári.“
Í gær sendi meirihlutinn síðan frá sér yfirlýsingu um að hækkunin yrði dregin til baka:
„Við teljum sanngjarnt að bæjarfulltrúar Grindavíkurbæjar séu á svipuðum launum og bæjarfulltrúar sambærilegra sveitarfélaga á landinu. En í ljósi kjaramála á vinnumarkaði munum við leggja til á næsta bæjarstjórnarfundi að draga til baka þær launahækkanir bæjarfulltrúa sem samþykktar voru á síðasta fundi bæjarstjórnar þann 26 nóvember síðastliðinn.“
