Landlæknisembættið hefur greitt alls um 480 milljónir króna í leigu vegna húsnæðis við Austurströnd og Barónsstíg frá árinu 2011. Þetta kemur fram í svari heilbrigðisráðherra við fyrirspurn Sigurðar Páls Jónssonar, þingmanns Miðflokksins.

Þá er leigukostnaður vegna skrifstofu embættisins á Landspítalanum, Eiríksgötu 5, 120.2 milljónir árið 2018. Leigukostnaður fyrir húsnæði Blóðbankans að Snorrabraut var tæpar 60 milljónir árið 2018.

Tíðir flutningar

Embættið er nú flutt í Höfðatorg, Katrínartúni 2,  eftir að hafa verið í Skógarhlíð og á Rauðarárstíg í skamman tíma, vegna myglu sem kom upp á Barónsstíg.

Landlæknisembættið var áður til húsa að Austurströnd 5, hvar það greiddi alls 110 milljónir í leigu frá 2011 til 2015. Nam meðaltalsleiga á fermetra 1.692 krónum. Hiti og rafmagn kostaði alls 7.6 milljónir.

Eftir sameininguna við Lýðheilsustöð þótti það húsnæðið of lítið og var því starfsemin flutt að hluta á Barónsstíg 47 sumarið 2011. Þar var embættið þangað til í maí á þessu ári.

Leigukostnaður var alls 370.7 milljónir króna á því tímabili, og hita og rafmagnskostnaður var 13.8 milljónir.

• Kostnaður embættisins vegna myglu sem upp kom á Barónsstíg nam 18.7 milljónum.
• Þar af kostaði skýrsla óháðs matsmanns 5.3 milljónir.
• Úttektir Mannvits og Eflu verkfræðistofa á húsnæðinu kostuðu einnig 5.3 milljónir.
• Sendibílakostnaður nam 3.7 milljónum.
• Embættið leigði á meðan húsnæði í Skógarhlíð í þrjá mánuði, sem kostaði 3.1 milljón.
• Þá kostaði 1.2 milljónir að þrífa húsnæðið í Skógarhlíð.