Útgerðarmaður var dæmdur á dögunum í 10 mánaða skilorðsbundið fangelsi og greiðslu sektar upp á rúmar 36 milljónir króna í Héraðsdómi Vesturlands, vegna meiriháttar skattalagabrots og peningaþvættis. Var honum gert að sök að hafa ekki gefið upp noktun á erlendu kreditkorti sem skattaskjólsfélag í eigu Sigurðar Gísla Björnssonar greiddi fyrir, samkvæmt frétt RÚV.

Taldi hann ekki fram réttar tekjur í skattaskýrslum árin 2013-2015, en þar vantaði 45 milljónir króna.

Gunnar nafngreinir manninn

Gunnar Smári Egilsson, stofnandi Sósíalistaflokks Íslands, greinir frá nafni mannsins á Facebook, og deilir frétt RÚV inn í Facebook-hóp sósíalista:

„Útgerðarmaðurinn sem dæmdur var fyrir skattsvik er Ólafur Rögnvaldsson, framkvæmdastjóri Hraðfrystihús Hellissands hf., stjórnarmaður í Samtaka fyrirtækja í sjávarútvegi (áður LÍÚ) og fyrrum sveitarstjórnarmaður Sjálfstæðisflokksins á Hellissandi og í Snæfellsbæ.“

Ein umfangsmesta skattarannsókn síðari tíma

Samkvæmt dómnum gaf Ólafur ekki upp tekjur frá Sæmarki Sjávarafurðum upp á 10 milljónir, né notkun sína á erlendu kreditkorti sem forsvarsmaður fyrirtækisins, Sigurður Gísli, greiddi fyrir. Greiðslurnar voru inntar af hendi frá félagi Sigurðar, Freezing point corp. sem finna má í Panamaskjölunum, en fyrirtæki Sigurðar Gísla hafa verið til rannsóknar hjá embætti héraðssaksóknara og stendur rannsókn enn yfir, en samkvæmt RÚV er hún ein sú umfangsmesta skattrannsókn síðari tíma.

Voru eignir Sigurðar fyrstar og hald lagt á bankareikninga hans árið 2017.

Fréttatíminn sálugi fjallaði um mál Sigurðar Gísla á sínum tíma, en miðillinn var þá undir stjórn Gunnars Smára.