Mér til mikillar ánægju rakst ég á þessa ljósmynd. Þetta er frá athöfn þar sem Jafnréttisráð heiðraði Rauðsokkur. Yst til hægri á myndinni er Katrín Jakobsdóttir forsætisráðherra.
Rauðsokkurnar voru að koma fram þegar ég var svona tíu ára. Þær vöktu óhemju athygli þegar þær gengu niður Laugaveg 1. maí 1970 með stórt líkneski af konu þar sem var letrað á borða „Manneskja, ekki markaðsvara“.
Á árunum þar á eftir höfðu Rauðsokkurnar gríðarleg áhrif á samfélagið. Það var gert grín að þeim, þær hæddar og spottaðar, margir hneyksluðust, en málstaðurinn var góður og þær biluðu ekki. Þær voru auðvitað hluti af hreyfingu sem náði út um víða veröld – frumherjar og frumkvöðlar. Þær ruddu braut.
Sjálfur fylgdist ég vel með þessu vegna móður minnar, Guðrúnar Ólafsdóttur, hún var virk í kvenfrelsisbaráttunni og margar konurnar á myndinni hér að ofan eru góðar vinkonur hennar. Mamma þjáist af heilabilun og dvelur á hjúkrunarheimili. En það er ekki síst vegna hennar að mér þykir vænt um að sjá þessa mynd.
Á myndinni eru í efri röð: Silja Bára Ómarsdóttir, formaður Jafnréttisráðs, Þuríður Pétursdóttir, Hildur Hákonardóttir, Guðrún Hallgrímsdóttir, Rannveig Jónsdóttir, Elísabet Gunnarsdóttir, Edda Óskarsdóttir og Katrín Jakobsdóttir. Neðri röð: Lilja Ólafsdóttir, Vilborg Sigurðardóttir, Helga Ólafsdóttir, Björg Einarsdóttir og Gerður Óskarsdóttir.