Fréttablaðið fjallar um málið í dag og hefur eftir Andrési Magnússyni, framkvæmdastjóra Samtaka verslunar og þjónustu, að félagsmenn hafi fengið þau skilaboð frá breskum birgjum að ráðlegt sé að birgja sig eins mikið upp af vörum og þeir geta því algjör glundroði muni ríkja í Bretlandi eftir Brexit.
Gengið hefur verið frá þríhliða samningi á milli Íslands, Noregs og Bretlands og verða engar breytingar á tollfrelsi við innflutning á vörum á milli ríkjanna. Þetta á við um allt sem flokkast sem hefðbundnar iðnaðarvörur. Einhverjar breytingar verða á málum tengdum landbúnaðarafurðum.
Fulltrúar atvinnulífsins funduðu með stjórnvöldum í utanríkisráðuneytinu í gær vegna málsins. Fram kom að Brexit getur haft áhrif á CE-merkingar en þær eru skilyrði fyrir að selja megi ákveðnar vörur á Evrópska efnahagssvæðinu. Breskar CE-merkingar gætu orðið gildislausar eftir Brexit.
Fréttablaðið hefur eftir Ólafi Stephensen, framkvæmdastjóra Félags atvinnurekenda, að einn stærsti óvissuþátturinn sé mögulegar tafir á tollafgreiðslu á ferskvörum.
„Talsvert stór hluti af ferskfiskútflutningi til Evrópusambandslanda fer í gegnum Bretland og menn vita ekki hvað gerist við Ermarsundsgöngin. Hvort það verða teknar upp heilbrigðisskoðanir og tollafgreiðsla.“